من كان رزقه على الله فلا يحزن

كتب   /  رضا اللبان

واحد بيحكي إمبارح الساعه ١٢ بالليل وانا راجع من الشغل ،
بعد ما وصلت البيت أفتكرت ان مافيش اكل فى البيت ،
فدخلت الشقه وسيبت الشنطه ونزلت تانى عشان اجيب أكل ..
وصلت عند البقال لاقيت واحد كبير فى السن ومعاه عيل صغير ، والواد الصغير عمال بيزعق معاه ..
فسمعت الراجل بيقوله ..
احنا مش معانا غير عشره جنيه هانجيب علبة جبنه وبجنيه عيش وجنيه تشترى لنفسك كيس كراتيه وتلاته جنيه نفطر بيهم بكره ..
والواد مصمم انه ياخد العشره جنيه كلها يشترى بيها لعبه عجباه ..
المهم الواد كان مضايق قوى ، والراجل الكبير غلبان جداً ومش عاوز يزعله ويكسر بخاطره ..
فالراجل قاله..
بكره تجيلنا فلوس وهاجيبلك اللى انت عاوزه ..
رد الولد وقاله انت كل مره بتقول كدا ومافيش حاجه بتيجى ..
الاب قاله ماتقلقش خلى ثقتك فى ربنا كبيره انه يقدر يفرحنا ويبعتلنا فلوس ..
الولد ساعتها بص للراجل بصه غريبه قوى وحط ايديه فى جنبه وقاله ..
طيب ماتخلى انت ثقتك فى ربنا كبيره وهات العشره جنيه اجيب اللعبه وهو يرزقنا بعد كدا ..
لقيت الراجل اتثبت بعد ما سمع الكلمتين دول ،
لكن انا كان عندى فضول شديد جدا اعرف رده هايكون ايه على الولد..

قام خده من ايديه بإبتسامه حلوه كده وقاله عندك حق تعالى ، وراح جابله اللعبه اللى عاوزه ..
الولد فتح اللعبه فوقعت منها ١٠٠ جنيه ..
بعد اندهاش الراجل من الفلوس اللى وقعت ..
عرفنا ان اللعبه فيها مكسب لما تفتح المكعب اللى فيها …
فالبقال ضحك وقال للراجل ..
الواد اللى معاك مرزق ، كل العيال بتكسب حلاوه ولبان وهو كسب فلوس ..
ضحك الراجل وقاله..
لا وانت الصادق ، ربك ماحبش يكسفنى قدامه !!

*الحكمــــــــه*
اللى يرمى همومه واتعابه واوجاعه على ربنا مستحيل يكسفه ..