الفنان احمد زكى ورغدة

كتب / حسن اللبان

كان بيحب “رغــــدة” جدا يمكن قد ما هي بتحبه واكتر .. بس كان عارف ان خطوة الارتباط هتكون الصخرة اللي هيتحطم عليها حبهم . هو قال في حوار قبل كدة انه عايز شريكة حياته تكون موظفة في حبه ، وبس هو محور حياتها ، وبس بتبتدى عنده وتنتهى عنده !! ولأن ده فشل مع زوجته الوحيدة “هالة فؤاد” ماكانش عنده استعداد يكرر ده مع “رغدة” خصوصا انها شخصية عنيدة جدا وقوية جدا . فضلوا طول الوقت مستنيين اللحظة اللي يكسروا فيها خوفهم ويعلنوا للعالم كله انهم بيحبوا بعض بس اللحظة دي مجتش . كانوا في مرة في حفلة تكريم احمد مظهر ومريم فخر الدين ماسكة ايده و سانداه وهو بيتعكز عليها ، فأحمد زكي سأل رغدة : هتسنديني زيها لو جيت اقع ؟ قالتله : أكيـــد ، أ أحمد زكي قعد في مستشفى دار الفؤاد في الاوضة 2229 لمدة سنة وشهرين ، وفي الفترة دي ناس كتير و وشوش كتير اتبدلت على احمد زكي الا وش واحد هو وشها الجميل . رغدة اخدت اوضة جنب احمد زكي وكانت مقيمه فيها ولمدة سنة وشهرين مكانتش بتفارق احمد زكي . أحمد زكي في أيامه الاخيرة طلب من رغدة الجواز شاف ان دة ممكن يعوضها عن سنييين كتير مطلبش فيها منها ده . ومع ذلك رغدة رفضت رغم انها طول الوقت كانت بتقول ان مجرد فكرة حب احمد زكي هي حلم ، بس في اللحظة دي رغدة كانت عارفة ان قبولها لطلب احمد زكي هو انانية منها ، رغم ان دة كان ممكن يحميها من اشاعات كتير . أحمد زكي كان بيراهن رغدة انه هيموت في المستشفى وهى كانت بتراهنه انه هيخرج عشانها وعشان الناس ، .. بس خسرت الرهان و فارق الدنيا و هو ماسك ايديها ، و فعلا اتعكز عليها زي ما كان بيحلم و هي سندته زي ما وعدت . أحيانا النهايات ما بتكونش زي ما بنتخيلها بس بتكون ذكراها اعظم واجمل بكتير من خيالنا .