الفنان شكوكو كان فى الأصل نجار

كتب / حسن اللبان

شكوكو بدأ حياته العملية نجار .. اتولد نجار وفضل نجار لحد مات، بنى عمارة من النجارة، ودخل الفن من باب النجارة، ولما وصل للعالمية برضه كان بسبب النجارة.

اول ما اتولد شكوكو جده اللى كان بيحب يربي ديوك كان عنده ديك مميز وبيحبه عن باقى الديوك، وكان مسميه شكوكو، ولما اتولد محمود صمم على أنه يمسيه شكوكو، واتسجل فى الاوراق الرسمية بالاسم ده .. وده عشان الناس اللى فاكرة ان شكوكو اسم شهرة.

اول ما بدأ شكوكو يقف على رجله ابوه خده معاه ورشة النجارة وفى وقت قليل اوى بقى اسطى معلم، لكن نداهة الفن ندهته، وبقى يجرى ورا الفرق رايح جاي، لحد ما ابوه خيره .. يا الفن يا النجارة .. واعلنها شكوكو وضيحة صريحة جريحة : الفن ولا شيء اخر غير الفن.

فى نفس الوقت برضه ابوه اعلنها هو كمان صريحة وضحية جريحة : “مالكش مكان فى بيتى” .. وبناء عليه خرج شكوكو من البيت يواجه المجهول.. لكنه بسرعة وقف على رجله وبدأ يشتغل فى كام ورشة، وسنة ورا سنة كون مبلغ اشترى بيه حق صغير عمله ورشة، وفضلت الورشة تكبر وتكبر لحد ما بقى بيتعامل مع الشركات الكبيرة، ولما كان بيجيله شغل كتير كان بيبعته على ورشة أبوة من غير ما يعرفه.

شكوكو فى يوم من الايام كان بيركب دولاب فى شقة ست بنت حلال سمعته وهو بيغنى وهو شغال فعرضت عليه تعرفه على قريبها اللى بيشتغل فى كازيون بديعة، ووافق، ومن فرحته قالها : هركب لك الدولاب مجانا ومش هاخد منك فلوس.. وفعلا راح الكازينو وانطلق فى مسيرته الفنية.

النجارة برضه وصلت شكوكو للعالمية لما بدأ يصنع عرايس بنفسه، وكان اول واحد فى مصر يعمل مسرح للعرايس وكان عامل تذاكره باسعار قليلة جدا عشان يبقى متاح للكل، وباع 3 عربيات من عربياته عشان يقدر على مصاريفه، لكن خسايرة كانت كبيرة وكتيرة فقفله وضاع معاه واحد من اهم احلامه.

شكوكو كان مطلوب فى اكتر من دولة عشان يعلمهم فن العرايس والاراجوز، واستعان بيه صلاح ابو سيف عشان يبقى مشرف على مشاهد الاراجوز فى فيلم الزوجة التانية.

وبعد الحرب عمل مسرح عرايس متنقل على عربية نقل، وكان بيمشى بيه يلم تبرعات للمجهود الحربي.

شكوكو لما جه يتجوز عمل كل عفشه بنفسه، ماهو عيب يجيب نجار يعمل له العفش وهو موجود، ولما كان حد يجيى يتجوز من الناس اللى شغاله معاه ومش قادر على تمن العفش كان بيعمله بنفسه، ومن غير مقابل.. وطبعا اى حاجة كانت محتاجة نجارة فى بيته لحد ما مات كان متكفل بيها.. يعنى من الاخر تقدر تقول بالفم المليان .. باب شكوكو مكنش مخلع زى باب باقى النجارين