كتب / رضا اللبان
سنة 1925 اتجند فى الجيش الفنلندى سيمو هايها و المشهور باسم سيمو هايا و كان فلاح فقير طوله 152 سنتيمتر و نحيف و كان عمره 20 سنة و طبعا لانه قصير و جسمه ضعيف فحاولوا يشغلوه فى اى اعمال ادارية او معاونة و لكن سيمو هايها كان بيشتغل صياد فى الغابات و ظهر لهم انه مميز فى الصيد و القنص فتم تدريبه و اشتغل قناص فى الجيش الفنلندى
لما قامت حرب الشتاء اللى بين روسيا و فنلندا فى 30 نوفمبر سنة 1939 خد سيمو هايا بندقيته و طلع يقنص الجنود الروس و كان بيقنص بيها من غير منظار لانه كان بيقول ان المنظار بينعكس عليه الضوء و بيكشفه و كان بيحط تلج فى بقه علشان مايطلعش بخار لما يتنفس او يتكلم فيكشف مكانه و كان بيلبس ابيض بالكامل علشان يستخبى فى التلج و ما يبان.
حرب الشتاء دى استمرت حوالى 4 شهور قتل خلالها 542 جندى روسى و اصاب يعنى قدر يقنص بدون منظار اكتر من 700 جندى روسى لدرجة انهم سموه الموت الابيض و قدر انه يكون احد اهم اسباب وقف الاجتياح الروسى للاراضى الفنلندية
يوم 6 مارس سنة 1940 قدر قناص روسى انه يشوف سيمو هايا فضربه بالرصاص فى رأسه و لكن الطلقة جت فى فكه و بعد انتهاء الحرب تم ترقيته من جندى الى ظابط برتبة ملازم و تم منحه نياشين و أوسمه تقديرا لمجهوداته
المصادر :
1 – الجحيم المتجمد – الحرب الروسية الفنلندية – وليم تروتر
2 – أشهر قناصى الحرب العالمية الثانية – أدريان جيلبرت
