بقلم دكتورة / أميرة حامد
انا تدخلت بين عبد الحليم وام كلثوم في أزمتهم مع بعض وفعلًا حليم اعتذر لها، بس الكبار دول ليهم احترامهم يعني، اول م دخل عبد الحليم من بره ولقاها قال: الولية دي لسة بتغني” وابن اختها واقف قلت له: اخرس ..وده كان في نادي الضباط قلت له: اخرس ابن اختها وراك، دي الغلطة اللى عملها بس.. هو مكانش بذىء اللسان ابدأ بس م اعرفش ايه اللي جرا له في اليوم ده، وبعدين انا صالحت عبد الحليم كمان مع فريد لما اختلفوا مين يغني في الربيع بس ام كلثوم كانت صعبة قوي ومش بتسامح بسهولة بالذات لأنها محترمة جدًا ومبتغلطش في حد، دي كانت تقوم تقف لاي حد ييجي يسلم عليها مهما كان وكنت اقول لها: ياختي اقعدي..فتقول لي: إحنا فلاحين ونعرف الأصول.
وياما وقفت لعبد الحليم، وكنت اقوله متعاديش اللى أعلى منك واذا عاديته يبقى بوضوح، ولما يكون عامل غلط كبير يبقى تعاديه بوضوح ولما يكون عامل غلط كبير في حقك متروحش تعمل زي النسوان اللى بيسمعوا كلام الرغي، يقوم يقول لي: حاضر وتاني يوم يعمل حاجه تانيه.
وفي مرة حليم ده جالي الساعة اتنين الفجر ، لقيت الجرس ضرب وانا كنت بحبه جدا كان يتيم وبيصعب عليا جدًا وقالي : انا مسافر ادعيلي وبعدها مشفتهوش تاني، والموقف ده حز في نفسيتي جدًا واتمنيت انه مكنش جه اصلا ولا شفته يومها.
انا كنت بحب عبد الناصر طبًعا اكتر من السادات، اللى كان لئيم، انا خدمته وشلته من الانجليز وقعد عند اختي في الوقت اللى كانت في مصر كلها بتدور عليه، وبعدها مخدمنيش في حاجة ابدًا ..لما شفته قلت له: أنا وانت والقانون وهاكسب القضية ، قال لي: عارف قلت له: هاشتغل الرواية بكرة وهاتشوف وعرضنا مسرحية “يحيا الوفد”. ومحمد نجيب انا كنت بحبه جدًا وبحب مراته اختها كانت صاحبتي اي حاجه تقولها يصدقها على طول، واهم راحوا خلاص بقى .
شتمت انيس منصور لما قالي اني متجوزه محرم فؤاد وانا وقتها كنت متجوزه دكتور حسن حسني اللي راح الاهرام وقتها وعمل مشاكل هناك. والاشاعة دي كان سببها محرم فؤاد، وعمره م كان صديقي انا كنت بساعده واقوله رأيي بصراحة، بس اقوله الاغنية دي وحشة يروح يعملها، يعني مثلا حد يعمل حسن ونعيمة وينجح فيه النجاح ده كله وبعد كدا يتنيل، إلا اذا كان مبيفكرش، وجالي وعيط قلت له: تكم مع زوجي ملكش دعوة بيه ابدًا.
لما كنت في المستشفى، مكنتش بفكر غير في صحتي، ولا بفكر حد بيزورني ولا لأ؟ طز، كفاية عليا اهلي، ورجاء الجداوي كانت بتتصل بيا كل يوم كنت بقولها: هو التليفون جه ببلاش ولا ايه؟ انما فريد شوقي عنده حق يعتب على الناس محدش بيزوره عيب برضه، هو فنان كبير لكن وبيكبر الحاجات قوي، فرحت له وقلت له انا طلعالك على كرسي متحرك راح معيط قتل له: لأ فريد شوقي “الوحش”ميعيطش محبش اشوفه بيعيط عنهم ماجم قول يارب، وهو كان ماسك المصحف على طول الوقت ووزنه نقص جدًا ومكنتش مصدقه ان ده فريد شوقي.
فلوس ايه اللى اعملها، اصرف ما في الجيب يأتيك ما في الغيب، اخلي الفلوس لمين، اعيش بيها واتمتع بيها، احنا زمان كنا ينصرف الفلوس على هدومنا وناكل ونأكل العمال اللى معانا ونقعد معاهم، وفيه مرة فريد شوقي في “الفتوة” قال: آخر يوم تصوير هيبقى صلاة العيد الكبير، فبعت اشتريت عجل وكان وقتها بعشرة جنية لما فريد لقاني اشتريت قال: أنا كمان، وفضلنا نزود لغاية م هو اشترى وانا عشرة، دبحنا واكلنا وشوينا واكلنا احنا والعمال وفرقنا الباقي، ده كان جو زمان، الحمد لله عشنا ولبسنا وأكلنا واتفسحنا وسافرنا..خلاص عايزين ايه تاني ؟
