الإعلامية رضوي الشربيني تكشف موقفها من الزواج

قالت الإعلامية رضوى الشربيني: “أتمنى أخوض تجربة الزواج مرة تانية، يوم ما ربنا هيرزقني بالراجل اللي يحبني ويقدرني ويفهمني ويطبطب عليَّ ويجبر بخاطري هكون سعيدة”.

مشكلة رضوى الشربيني مع الرجال

وأضافت خلال الجزء الثاني من لقائها ببرنامج “أنا والقناع” الذي تقدمه الإعلامية إيمان أبو طالب بقناة “سي بي سي”: “الرجالة في حياتي بحس إنهم بيخافوا جدًّا يقربوا ودا لغز بالنسبة لي، وأنا بقيت عايزة أقرب علشان أفهم إيه اللي جوة الصندوق”.

موقف رضوى الشربيني من الخيانة

ولفتت رضوى الشربيني: “لو لقيت الراجل المناسب واتجوزته، وبعدين اتخنت همشي فورًا، ولا هعمل حاجة، ولا هدبدب في الأرض ولا هعيط ولا هقوله خُنتني ليه”.

في نفس اللقاء، ردت الإعلامية رضوي الشربيني على تساؤل وجهته إليها الإعلامية منى عبدالوهاب في الجزء الثاني من استضافتها في برنامج “أنا والقناع” حول ما إذا كانت الفنانة شيريهان خالة زوجها، كانت على علم بطلاقها وخروجها من منزلها مع بناتها وفي جيبها 180 جنيه فقط، قائلة: “ما أعرفش.. اعرفي أنتِ استضيفيها واسأليها”.

لجأت لربنا

وحول ما إذا كانت لجأت لها أو تواصلت معها فقالت رضوى: “وألجأ لها ليه هي خالة باباهم.. أنا لجأت لربنا وهو كان رحيم بيَّ أنا وببناتي، أنا شُفت قدرة ربنا سبحانه وتعالى وفي تحويل حياة واحدة مفلسة بائسة غير ناجحة في حياتها، لواحدة تانية خالص.. فأي حق ليَّ عند أي حد مش عايزة في الدنيا”.
وكانت الإعلامية رضوى الشربيني، قد كشفت مواصفات رجل أحلامها، الذي تريد الارتباط به، قائلة: “لازم يكون عنده مبدأ إن الدين المعاملة”.

مواصفات الرجل المثالي  لـ رضوى الشربيني

وتابعت: “الرجل الحقيقي لازم يكون قوي مش بعنتظته وشخطه ونطره وصوته العالي، الرجل القوي يقويكِ ما يقواش عليكِ وحتى عند الفراق يجيبك ويقول لك أنا مش عايز أكمل لا يجرحك ولا يهينك ولا يخونك”.

وأضافت: “الراجل لازم بيكون بيحاول ويكد ويسعى في الدنيا علشان يسعد نفسه ويسعدك ويكون حنين من القلب وظهر وسند موجود عند اللزوم”.

وأكملت: “الراجل ما بيضحكش على بنات الناس ولا بيهين بنات الناس، وأكيد النوعية دي موجودة وقابلت النموذج دا، وقابلته في حياة أخريات وكنت بنصحهم انهم يحافظوا عليه ويستحملوه ويكونوا شركاء للحياة ويمتصوا غضبه ولو مكنش معاه متثقليش عليه بالطلبات”.

 مواصفات رجل الأحلام

وعن مواصفات رجل الأحلام، أوضحت رضوى الشربيني: “عايزة رجل يكون قادر علشان أنا ست قادرة، وكل ما يكون رجل قادر مش هيبص على أخطائي والصغائر اللي أنا بعملها وهيكبر دماغي ومش هيتلكك لي ومش هيبص على عيوبي”.

وأضافت: “عايزاه رجل قوي يقويني يبقى ضهري وسندي ويتكلم معايا في البرنامج والحياة، قوته يستعملها معايا مش عليَّ، ولازم يكون ناجح، ما أقدرش اتجوز راجل مش ناجح، ويكون عنده طموح، ويتقي ربنا في معاملة البني آدمين وأنا مش أولهم والدته ووالده”.

واختتمت: “عايزاه يهتم بيَّ أوي ويعرف يتعامل معايا علشان أنا صعبة أوي، ويكون دمه خفيف، ما أقدرش اتجوز راجل دمه تقيل، ولازم يبقى شيك كدا في نفسه وخفيف”