كتب / حسن اللبان
اللى فى الصورة ده صاحب أغرب حكاية فى الوسط الفنى، واغرب شرط للتمثيل، خلاه يمثل لأول وأخر مرة فى حياته.
صاحبنا ده يبقى أنور أحمد، كاتب وصحفى، وكان من الأصدقاء المقربين للكاتب والأديب الكبير توفيق الحكيم، وسبق له وشغل منصب وكيل وزارة الشئون الاجتماعية.
المهم أن أخينا فى يوم من الأيام لقى المخرج أحمد بدرخان بيطلب منه أنه يكون بطل فيلمه الجديد عن مصطفي كامل، طب ليه أنا يا استاذ بدرخان ؟ مجبتش ممثل كبير ليه ؟ فقاله عشان انت تشبه الزعيم مصطفى كامل بشكل كبير يا أنور.
أنور طبعا اتبسط، شبه مصطفى كامل بقى، وهيعمل فيلم عن مصطفى كامل، ومين عارف يمكن البلية تلعب ويبقى نجم مشهور، لكن بدرخان قضى على كل ده واشترط عليه أن يعمل الفيلم وميقدمش أى أدوار تانية، يعنى بالبلدي كده يكون فيلم مصطفى كامل ده أول وأخر فيلم.
الغريبة أن أنور وافق، وفعلا قدم الفيلم، ومقدمش ولا دور واحد بعد كده، رغم ان جاله عروض كتيره بعدها بس هو رفض احتراما لكلمته والعهد اللى كان بينه وبين بدرخان.
بالمناسبة أنور أحمد شارك فى كتابة السيناريو الخاص بمسلسل الأيام اللى قدم سيرة الأديب الكبير طه حسين.
