كتبت / سلوى لطفي
#اتجوزت ١٢ مرة وعمري ما تقدمت لواحدة، هما اللي بيتقدموا لي… أول زوجة #سهير_رمزي ومن صغرها قارئة للقرآن… وأول حب كانت بنت الجيران ومسيحية ….خلفت بنتي وأنا عندي ٨٠ سنة… جبت #المأذون ورجعت مراتي أول ما عرفت إنها حامل… فيه واحدة من زوجاتي حطت لي منوم وسرقت خزنَتي… بنام على صوت #القرآن_الكريم… وفيه بيني وبين ربنا عمار، وياما كوارث أشوفها وربنا يطلعني منها…
كاتب على باب بيتي: رايح فين؟ اتأخرت ليه؟ جاي منين؟ الساعة كام؟ تبقى طالق…
حرفوا كلامي عن #نجاة وحلفت ما أتكلم في مواقع تاني ..
بحس إني عندي ٢٠ سنة، وكل واحدة صغيرة في السن كنت بتجوزها كنت بعيش سنها…
لو شفت قطة في المطر بتتنفض بعيط… أنا أغلب من الغلب ، وساعات أقعد لوحدي أعيط…
مفيش مخلوق على وجه الأرض يعرف مين #وردة الجزائرية… وردة اللي اتظلمت من تلات رؤساء، رغم إنها أطيب وأكرم مخلوقة هي وصباح…
#أمال ماهر صوت لم يحدث في تاريخ الغناء…
المرة الوحيدة اللي طلبت فيها واحدة للجواز كانت للونس…
أنا لا أقتني السيارات ولا السيدات… السيارات كانت هواية، والسيدات كنت ببحث فيهن عن حياتي…
بيطلبوني بعد الطلاق لأي مساعدة، وبروح أدفع لهم مصاريف أولادهم في الجامعة…
اتجوزت أخت #شويكار، أبوها رهيب منعها تدخل بيته بعد ما مثّلت، وكان بيوصف الأستاذ فؤاد المهندس بالبلياتشو….
الموزع بقى أكبر من الملحن، وبيقعد في وسطهم يظبط الأغنية كأنه عند الفطاطري… حولت عمار الشريعي وحسن أبو السعود إلى ملحنين…
#حلمي_بكر: أنا بدأت الـ٨٠ سنة وبنتي عندها ٤٠ يوم.
واللي يخاف مش هيعيش… المهم إنك تقرأي الحياة.
أنا فوجئت بمراتي حامل، وفكرتها بتهزر لحد ما بانت عليها علامات الحمل، وأنا اتضايقت، بس هي لا ليها ذنب ولا اللي هيتولد له ذنب.
أنا عندي ابني الوحيد هشام من زوجتي التانية، واتخرج من جامعة سان فرانسيسكو، واتحط في الموسوعة، متجوز ومخلف، عايش في أمريكا… يوم عيد ميلادي جه لي مصر وعرفته إنه له أخت اسمها ريهام، على وزن اسمه.
وبخفة دم قالي: خلاص أجيبها لولادي يربوها وتبقى عمتهم.
أنا بحس إني عندي ٢٠ سنة. فيه أولاد عندهم ١٠ سنين وتحسيهم ٥٠ سنة، وفيه شاب صغير كل شعره أبيض ملوش ذنب… أوروبا وأمريكا، شوفي الراجل عنده كام والست، وتلاقيه حاضنها وبيعديها الطريق.
عمري ما تقدمت لواحدة اتجوزها…
مرة أم وبنتها ١٧ سنة جابتها ليا وقالت لي: شوف لك حل فيها، غلبتني، والبنت قالت لي: أنا بحبك أوي وبصراحة عاوزة أتجوزك!
وأديتها تجربة إنها تعيش، وقدمت لها بمعهد الموسيقى، بس طلقتها عشان ما كانش ينفع نستمر…
كل واحدة انفصلت عنها بقول لها إن مش هينفع نكمل، بس ممكن نكون أصحاب كويسين. هما اللي بيحددوا مدة حياتنا سوا، مش أنا…
بعض الإعلاميين عاوزين يكتبوا قصة حياتي. لو قصة حياتي اتقرت صح، هتلاقيني إنسان فوق العادة، مش بقولها بغرور
أنا أطيب وأغلب من الغلب ، وساعات أقعد لوحدي أعيط، وده كتير…
أنا اجتماعي وبحب الهيصة، ولما أحب أنام أشغل مزيكا هادية أو أفتح قرآن لحد ما أصحى، ودايمًا حاطط قدامي ربنا.
لو شفت قطة في المطر بتتنفض، بعيط…
أول قصة حب في حياتي كانت بنت الجيران ومسيحية.
اتجوزت ١٢ مرة. أول جوازة ليا كانت الفنانة سهير رمزي قبل ما تكون فنانة، والدتها اللي كانت فنانة كبيرة، درية أحمد، رحمة الله عليها.
سألت مامتها عليا: مين ده؟ وعزموني على الغدا… وقالت لي: سوسو اللي عاملة الأكل. ولما وصلت عرفتني إن سهير معجبة بيا. كان عندها ١٦ سنة وأنا ٢٢ سنة، واتفقنا على الخطوبة… بس قلت لها: أنا لسه ببدأ حياتي ومش هخلي باباها هو اللي يأكلني. كان ردها: دبلتين واتفضلوا ابعدوا عني.
سهير ربنا ينور لها طريقها، كانت من صغرها تقعد تقرأ قرآن في السرير.
يوم خطوبتنا لاقيت وردة جايبة الفرقة الماسية وجاية وقالت: إنت بتتجوز من ورايا؟ عشان تعرفوا إزاي وردة إنسانة، اللي اتظلمت من تلات رؤساء و طردوها.
وردة الجزائرية شافتني وهي عندها ٢١ وأنا في بروفة «الوطن الأكبر». كانوا بيقولوا عليها الفتاة وردة.
كانت منتهى الرقة والكرم والطيبة، ولا مخلوق يعرف مين وردة دي، عاوزة مليون حلقة.
كنا بنكتب لها كلام الأغاني باللاتيني، ما تعرفش عربي، وأول أغنية عملتها ليها «شوية صبر يا قلبي».
كل زوجة انفصلت عنها بينا احترام وحب وبنسأل على بعض، ما عدا العاشرة، حطت لي مخدر وسرقت خزنَتي.
المرة الوحيدة اللي طلبت واحدة للجواز كانت للونس ومحتاج حد يقعد معايا. كنت أوقات أتعب والمساعدين في البيت ياخدوا الحاجة اللي في بيتي .
أطول جوازة كانت أم ابني، ١٣ سنة، أخت الفنانة شويكار. كان أبوها تركي .
وأقل جوازة كانت أربع أيام. سألتني: إنت في إيدك ساعة؟ قلت لها: هنزل أشوف الساعة، لأن ساعتي عطلانة، وروحت حاجز أوضة في أوتيل… قلت لها: إنتِ طلعتي ذكية وجيبتي جملة مش على الباب، فأنا هضيف الساعة في إيدي وأكتبها على الباب، وده لأول مرة أدي إنذار.
أنا كاتب على باب بيتي: رايح فين؟ اتأخرت ليه؟ جاي منين؟ الساعة كام؟ تبقى طالق… لكن واحدة جت رشت الباب بإسبراي.
فيه زوجة رجعتها تلات مرات، لكن مفيش فايدة فيها… وجميعهم ساعدتهم في حياتهم، منهم اللي شغلتها مذيعة في الإذاعة، ومنهم المخرجة.
محمد عبد الوهاب كان بيتصل عليا في البيت: ألو نانا هانم، اديني الأستاذ حلمي. تقوله: أنا سوسو.
بعدها بفترة يتصل: ألو سوسو هانم، تقوله: أنا منى.
فرد: اديني اللي عندك ده، هو بيخلص منكم إزاي!!
عمري ما حسبت تكاليف جوازي أو طلاقي، وربنا كان كارمني… فيه إحدى زوجاتي جبت لها خزنتين فيهم ألماس بأرقام.
ومرة وردة جابت لزوجة منهم طقم مجوهرات بقيمة ٦٠ ألف جنيه، والذهب وقتها كان بنكلة .
وبعطيهم المؤخر كامل… وأي فلوس كانت بتروح، كام بيجي غيرها….
كنت بحس الزمن متغاظ مني: إنت مش عامل حسابي ليه؟ مش أنا محسوب على كل البشر؟ لكن يعتقد ما يعتقد، الزمن أنا حاطه ورا ضهري… أوقات مش بيبقى معايا ولا مليم….
هوايتي جمع العربيات التحف وبيعتها… واحدة منهم ما كانش ليها مثيل بمصر….
أنا لا أقتني سيارات ولا سيدات… السيارات كانت هواية، والسيدات كانت حياة، كنت ببحث عن حياتي….
وأكبر غلط ينقال: لأجل العيال اصبر ويكملوا، وفيه تراب جه في حياتهم منضفهوش.
أنا طيب جدًا في بيتي وكريم… اللي انفصلت عنهم أوقات يطلبوني لحل مشاكلهم المادية، لحد مصاريف أولادهم.
سماح، زوجتي الأخيرة، انفصلنا لكن كنا بنرجع كل مرة، ولما عرفت إنها هتخلف بنتنا جريت جبت المأذون… الإنسان اللي جوايا أقوى من أي حاجة في الدنيا، وبقيت أطمن عليها قبل بنتي.
اتعلمت إن كل مشكلة أعدي منها وأنا سليم فبتلاقيني مستعد دايمًا، وإن الحياة ما انتهتش، الحياة قادمة.
لو مراتي في باريس معايا وشفتها واقفة على ڤاترينه محل وقرت السعر ومشيت لأنه غالي، تاني يوم تلاقي الحاجة اللي بصت عليها قدامها.
عمري ما غلطت لا بلفظ ولا بإيدين ولا بتجاوز… أنا بقاطع، تتمنى إني أكسر البيت ولا أقاطعك….
أكتر مما تحتاجه الزوجة بعمله… بكون أكتر من طفل في البيت، وبتنقل لسنها….هما اللي بيقرأوني غلط.
أنا بقرا كل حاجة صح… ربنا مخليني أقرأ الناس والأشياء قبل حدوثها.
أنا ضد كل اللي بيغني وحش، والساحة مليانة مطربين وحشين، بقول فلان نجم ولكن…
إذا كانت مراتي مفهمتنيش وطلقتها، الفنانين هما اللي هيفهموني و
أنا خبرة ٥٦ سنة ملحن محترف… وفوجئت إن فيه موقع محرف كلامي عن نجاة، والنعمة دي ما قولته.
قلت: كون نجاة بتغني بتدب فينا الروح والحياة، وإن أرضنا اللي هتضيع مننا لازالت بخير، غنت بطريقة أو بأخرى، فأنا عاوزها تغني بكل الوسائل. أنا برحب بالتكنولوجيا إنها تقف جنب نجاة….
فوجئت بكلام محرف بعدها على لساني لدرجة رميت الموبايل….
عشان كده قررت مستحيل أتكلم في أي موقع… إنتوا بتحرفوا كلامي ليه!!!
هو الميوزيكال شو مين دخلها في مصر في مسرحية «سيدتي الجميلة»….بتطبطب على الفنان وبحتويه عشان يقدر يغني، وخليت سعد الصغير يقول نكتة وضحكنا، وهو دمه خفيف، وغنى مونولوج لإسماعيل ياسين.
فكتبت: يُعتمد غناء خفيف «مونولوجست».
أنا صريح ومفيش بطحة على دماغي، لكن إزاي ممكن حد يتطاول عليا….
عندي استوديو في بيتي فيه ٣٠٠ لحن، وعندي مكتبة مزيكا مش عند حد.
كل المطربين اللي بيطلبوا ألحاني بقول مش للبيع، بديها لأصوات جديدة…
ده إحنا عندنا أمال ماهر، لم تحدث في تاريخ الغناء… ربنا مديها موهبة عبقرية، لكن جت في توقيت نحن نسمع بأعيننا.
لما بتسأل: مبقتش تلحن ليه؟ لأن التربة بقت غير صالحة للزرع، كتير من الأرض بقى فيها خرسانة.
عملت لحن لكارمن سليمان وهي تلميذتي، وغادة رجب من وهي طفلة.
معظم الموجودين بقوا بيلحنوا جماعي، وبيقعد في وسطهم الموزع يظبط الأغنية كأنه عند الفطاطري.
الموزع بقى أكبر من الملحن.
عمار الشريعي حبيبي، و١٢ سنة اشتغل معايا عازف ….وحولت عمار الشريعي وحسن أبو السعود إلى ملحنين، لأن جواهم جمل موسيقية.
لذلك أنا فيه بيني وبين ربنا عمار، وياما كوارث أشوفها بعيني والاقي ربنا بيطلعني منها…..
