كتبت / آمال فهمي
كشفت أوراق تحقيقات النيتبة العامة فى قضية جلب وتصنيع المواد المخدرة، التى قضت فيها محكمة جنايات القاهرة بالإعدام شنقًا بحق الإعلامية سارة خليفة، عن إنكار المتهمة القاطع لجميع التهم الموجهة إليها بإدارة أو الانضمام لتشكيل عصابى دولى، مُستندة فى دفاعها إلى تاريخها العملى فى المجال الإعلامى ودخل شهرى يبلغ نحو نصف مليون جنيه، وذلك فى معرض ردها على ملابسات ضبطها داخل شقتها بمنطقة العجوزة والتحفظ على مبالغ مالية بالعملات الأجنبية ومقتنيات ذهبية وسيارات فارهة.
نص اعترافات سارة خليفة بعد الحكم بالإعدام شنقًا في قضية المخدرات الكبرى
واستعرضت خليفة أمام محققى النيابة العامة تفاصيل ملاءتها المالية وأنشطتها التجارية بين القاهرة ودبى، موضحة أنها تدير شركة لتنظيم الحفلات بدولة الإمارات تجنى منها أرباحًا تتراوح بين 30 و50 ألف دولار فى الحفل الواحد، فضلاً عن تجارتها فى السبائك الذهبية وشراكتها فى عيادة تجميل، ومؤكدة أن جميع المبالغ والمقتنيات المضبوطة بحوزتها هى حصيلة نشاطها المهنى والتجارى المششروع، ولا صلة لها بأى نشاط غير قانونى للجلب أو الاتجار بالمواد المخدرة.. وإلى نص أقوالها:
س: ما قولك فيما هو منسوب إليك من أنك متهمة وآخرين معلومين بتأليف عصابة والانضمام إليها غرضها جلب المواد المخدرة داخل جمهورية مصر العربية بالمخالفة لأحكام القانون وهى المضبوطات السابق عرضها عليك بقصد الاتجار فيها على النحو المبين بالأوراق؟
ج: محصلش أنا معرفش حاجة عن الكلام ده.
س: ما قولك فيما هو منسوب إليك من أنك متهمة وآخرين معلومين بتأليف عصابة والانضمام إليها غرضها تصنيع المواد المخدرة وهى المضبوطات السابق عرضها عليك بقصد الاتجار فيها على النحو المبين بالأوراق؟
ج: محصلش أنا معرفش حاجة عن الكلام ده.
س: ما قولك فيما هو منسوب إليك من أنك متهمة وآخرين معلومين بتأليف عصابة والانضمام إليها غرضها الاتجار فى المواد المخدرة على النحو المبين بالأوراق؟
ج: محصلش أنا معرفش حاجة عن الكلام ده.
س: ما قولك فيما هو منسوب إليك من أنك متهمة لإحراز وحيازة جواهر مخدرة بقصد الاتجار وفى غير الأحوال المصرح بها قانونًا على النحو المبين بالأوراق؟
ج: محصلش أنا معرفش حاجة.
س: ما الذى حدث وما هى ظروف ضبطك وعرضك علينا؟
ج: قالت: «اللى حصل إنى يوم الأربعاء اللى فات الساعة 10 بليل كلمتنى أم فتحى خالد، وقالتلى سيبى البيت عشان الحكومة أخدت أحمد عطية وبيدوروا على خالد أبو فتحى وأكيد هيجولك عشان يسألوا على أبو فتحى وسيبى البيت وامشى، وأنا قولتلها أنا همشى وأسيب البيت ليه أنا مالى ومالكم ولو إنتوا خايفين أنا مش خايفة لأنى معملش حاجة غلط وقالتلى إنتى مش بتعرفى تسافرى الإمارات قولتلها أيوة أنا معايا إقامة ذهبية فى الإمارات بس أنا مش همشى وأسيب البيت وقولتلها لو إنتوا شايفين إنكم عملتوا حاجة غلط أنا شايفه إنى معملتش حاجة غلط وفات على المكالمة دى حوالى 15 ساع، ولقيت الحكومة عندى فى البيت فى أوضة نومى بيصحونى من النوم وده كان يوم الخميس اللى فات ما بين الساعة 12 أو 1 الظهر، وهما خبطوا على الباب والشغالة مفتحتش ومعرفش هما كسروا الباب ولا دخلوا إزاى، وأول حاجة سألنى الظابط إنتى حاطة كاميرا فى أوضة نومك ليه، قولتله أنا حاطة كاميرا عشان أنا عندى شغالات وعلى طول بتسرق، وأنا موجهة الكاميرا على الخزنة فى أوضة نومى وسابونى ألبس وخدونى معاهم وقبل ما ننزل قالى افتحى الخزنة، وفتحتها وسألنى كل المتعلقات اللى فى الخزنة بتاعتك قولتله أيوة، وسألنى على الدولارات اللى فى الخزنة قولتله 10 آلاف دولار فقالى دول أقل من المبلغ ده وقولتله اللى حضرتك شايفه، وقالى خدى عديهم وأنا قولتله مش قادرة أعد واللى حضرتك شايفه والخزنة كان فيها ذهب وفلوس إماراتى وفلوس سعودية، وبعدين شاف ساعات وسألنى بتاعتك قولتله أيوة والظابط أخد كل المتعلقات دى والمبالغ المالية، وبعدين بابا وماما نزلوا والظابط قالى يلا تعالى معانا وماما، وهى شايفانى فى الموقف ده وخدونى معاهم وأول ما خرجنا من البيت جاب محمد بتاع الجراج وسأله سارة عندها عربية هنا ومحمد قاله سارة بتحرك بعربية والدتها، وقاله إنتى عندك عربيتين وشاورله على عربيتين واحدة رانج روفر بتاعت والدتى، والتانية هيونداى توسان بتاعت جوز أختى، وركبت فى العربية الهيونداى، وهو ساق العربية».
وأضافت: «ركب جنبى اتنين أمناء ومشينا، ورحنا على الإدارة للمخدرات وإحنا فى الطريق كان واخد تليفوناتى وسألنى التليفون الرئيسى بتاعى الآيفون 15 اللى لونه فضى وسألنى على الرقم السرى، وقولتله وبعد ما أخد تليفونى وفتحه وكل شوية يسألونى الدى فى آر فين يا بنت وقولت الدى فى آر متوصل فى دبى وطبعًا قطع كل سلوك الكاميرات أول ما دخل الشقة، ووصلنا الإدارة وأول ما دخلت الإدارة دخلت مكتب فيه المساعد والناس كلها وقعدوا يسألونى عن الدى فى آر بتاع الكاميرات فين، وقالولى إحنا أخدنا الدى فى آر بتاع المحلات اللى حواليكم كلها وفين الدى فى آر بتاع الشقة بتاعتك، وقولتله سيستم الكاميرات موجود على الموبايل عندى ومتوصل على رسيفر فى دبي».
وتابعت قائلة: “وسألنى أم فتحى وأبو فتحى فين قولتله أم فتحى كلمتنى وقالتلى إنها راحت عند أختها صابرين فى المقطم، وسألنى علاقتك بيهم إيه وقولتله إن أم فتحى جوزها وابنها فتحى وجوز بنتها معرفش اسمه الثلاثة محبوسين، وقعد يسألنى الشغل بيجى من برة إزاى قولتله معرفش حاجة عن الشغل قالى مامتك وقولتله أعرف اتنين واحد اسمه (سامح) وده عايش فى دبى وهربان من مصر بسبب قضية مخدرات، وقولتله أعرف بنت اسمها (نرمين) لكن الحقيقة أعرف إن (سامح) يعرف واحد اسمه (إسلام) مرة نزله بعلب زى كده فى المطار و(إسلام) اتخانق معاه وسرقه والحكاية دى اتشهرت أوى فى مصر، وعشان كده عرفتها وقالى يعنى الاثنين دول هما اللى بيدخلوا مخدرات قولتله أيوة وسألنى ومعاهم كام واحد تانى قولتله معرفش.
س: متى وأين تم ضبطك؟
ج: أنا القبض عليا يوم الخميس اللى فات الساعة 12 الظهر من بيتى فى العجوزة.
س: وما هى تفصيلات نشأتك؟
ج: أنا عندى أخ وأخت وهما (محمد) و(شروق) عندها 27 سنة، ووالدى كان شغال موظف حاجة وراح اشتغل فى هيئة قناة السويس وحاليًا بالمعاش ومامتى طول عمرها شغالة فى مستشفى، ودلوقتى شغالة فى العيادة الخاصة بيا وأنا طفلة كنت عايشة مع أمى وأبويا فى النزهة وبعدين عشنا فى العبور وأنا فى أيام الكلية وبعدين رحنا عشنا فى مدينتى وأنا عندى 20 أو 21 سنة، وكنا عايشين فى بيت والحلو أنا وأختى وأخويا وأبويا وأمى وأختى اتجوزت وهى عندها 21 سنة وجوزها شغال فى ميناء إسكندرية وعنده شركة هناك شغل نقل عربيات، وحاجات زى كده وأخويا (محمد) كان متجوز قبلها وحياتى كانت طبيعية ومفيش فيها مشاكل واتجوزت 2015، واتطلقت فى 2017 ومن ساعتها وأنا عايشة مع بابا وماما فى البيت.
س: وما هى حالتك الاجتماعية إذًا؟
ج: أنا اتجوزت مرة واحدة وماتجوزتش تانى وحاليًا مطلقة.
س: وما سبب طلاقك لتلك الزيجة السابقة؟
ج: أنا جوزى كان لاعب كورة ولما سافر برة مصر حياتنا بدأت متبقاش مستقرة.
س: وهل أنجبتِ ثمة أطفال؟
ج: لا.
س: وما هى مراحلك التعليمية المختلفة؟
ج: أنا دخلت الابتدائية فى مدرسة رجاك وبعدها روحت مدرسة الأورمان، وأخدت الإعدادية وفى ثانوية عامة أخدتها من مدرسة حكومية كانت عند شغل مامتى فى السلام، وبعدين دخلت كلية حقوق جامعة عين شمس واتخرجت فى 2008 وأخدت بكالوريوس إعلام من الأكاديمية الدولية للإعلام، وكنت بشتغل هناك مذيعة وبدرس فى نفس الوقت وأخدت بكالوريوس الإعلام قبل ما اتجوز بحوالى 3 سنين.
س: وما هى الوظائف التى شغلتها خلال فترة حياتك؟
ج: وأنا عندى 13 سنة كنت بعمل برنامج أطفال فى قناة إيه آر تى وفضلت شغالة فى القناة دى فى مصر مذيعة فى برامج مختلفة وكانت كلها برامج منوعات لحد ما دخلت الكلية وأثناء دراستى فى الكلية، اشتغلت مذيعة فى قناة الشرقية العراقية والقناة دى قدمت فيها برامج كتير وكان نوعية البرامج إننا بنغطى أحداث افتتاح الأفلام والمسلسلات ودار الأوبرا، وبعدها اشتغلت فى قناة المحور وكنت بقدم فيها برنامج اسمه مهمة صعبة تبع وزارة الداخلية، وكان طبيعة شغلى بنزل أعمل مقابلات مع الظباط أو مدير الأمن أو المتهمين، وفضلت فى البرنامج ده حوالى 4 سنين وبعد البرنامج ده قررت أفتح عيادة وفى مرحلة من حياتى قبل ما أفتح العيادة كنت شغالة فى دبى بعمل إعلانات على السوشيال ميديا، وكان فيه شركة إعلانات ماضية معايا اسمها فورد كشر ميديا كنت بعمل دعاية للفنادق وكنت باخد من الفنادق دى نسبة من النزلاء اللى بيجوا كل شهر، وأى حاجة بشكل عأم بعمل لها دعاية وآخر شغل ليا إنى فتحت عيادة تجميل فى 2018 بس العيادة مش مرخصة باسمى وهى باسم شريكى دكتور أحمد رزق ووقت الكورونا سافرت دبى وعملت عقد فى دبى مع مجموعة الحبتور بتاعت تنظيم الحفلات وفتحت شركة فى دبى فى 2021 أو 2022 اسمها سارة برودكشن وعمل الشركة هو تنظيم الحفلات للمطربين، وآخر حاجة بجانب شغلى عملت برنامج اسمه سارة وبيكا فى قناة اسمها «عي»، وفى العموم أنا فى الغالب كل سنة بعمل برنامج بجانب شغلى وعلى طول بسافر السعودية بعمل إعلانات هناك.
س: وما هو مقدار دخلك الشهرى؟
ج: ممكن يوصل لنص مليون جنيه شهريًا.
س: ما هى مصادر دخلك تحديدًا؟
ج: عبارة عن تعاقدات للحفلات وتعاقدات الإعلانات وشراكة العيادة.
س: ماذا بشأن الشركة الخاصة بك المنشأة بدولة الإمارات؟
ج: طبعًا دى أكبر مصدر دخل بالنسبة ليا.
س: وما مقدار أرباح تلك الشركة تحديدًا سنويًا أو شهريًا؟
ج: أنا بكسب فى الحفلة الواحدة من 30 إلى 50 ألف دولار وبعمل فى السنة حوالى بين 12 إلى 15 حفلة تقريبًا.
س: وهل من مصادر دخل أخرى خاصة بك؟
ج: أنا بحب أتاجر فى الذهب وأى فلوس تيجيلى أشترى بيها سبيكة وبعدين لما تكسب أبيعها.
س: وما هى أملاكك تحديدًا؟
ج: أنا عندى شقة فى التجمع وناسية عنوانها لأنى لسة متسلمتهاش تبع شركة نادر خزان المثمن العقارى، وشقة التجمع لسة مبقتش باسمى وحاليًا معنديش حاجة باسمى.
س: ومن هو المتعاقد على تلك الشقة إذًا؟
ج: اسمه أستاذ إبراهيم.
س: وما هى بيانات المدعو إبراهيم؟
ج: معرفش بياناته.
س: وما سبب التعاقد على الشقة المملوكة لكى لآخر مجهول؟
ج: هو التعاقد مش باسم حد تانى هو إبراهيم ده كان شارى الشقة وأنا اشتريتها منه.
