بقلم دكتورة / آمال إبراهيم
كام خريف عدى على قلبك؟
يا ترى كام سنة عشت بجد؟
مش بالورقة والقلم…
العمر حكايات مش سنين بتتعد!!!
مش بالعدد بنقيس سنين عمرنا… الحكاية أعمق من كده بكتير… عمر الواحد فينا بيتغير فيه شكله ولونه مع كل موقف… مع كل إحساس بيهز القلب…
فيه كلام زي النسمة الحلوة… بيهون على الروح… بيرجع فيها حتة طفولة و براءة نسيناها…. تحس ساعتها إن عمرك لسه بيبتدي…
وفيه كلام تاني زي الشوكة اللي بتغز في القلب… بتخلي الدنيا سودة قدام عينك… وتحس إن السنين جريت بيك ألف سنة لقدام في لحظة وجع…
عمر الواحد خليط من كل الفرح اللي فرحناه… وكل الزعل اللي كسرنا… كل كلمة طيبة سمعناها نورت وجهنا… وكل قسوة دقتها خلت القلب يذبل…
وده بيفكرني بكلمات الرائع جاهين: “عمري مش ثلاثين ولا أربعين ولا حتى خمسين… عمري بيكبر ويصغر مع كل كلمة حنين أو كلمة قسوة تخلي قلبي حزين… وعجبي”…
متستغربش لما تشوف حد طاير من السعادة كإنه لسه مولود… أو لما تشوفه هو هو مهموم كإنه شايب وعجوز… دي حكايات العمر وأفعال الكلمات والمواقف اللي بتلعب بينا وبتلون أيامنا بألف لون…
العمر إحساس مش بس تاريخ ميلاد👌
