بقلم / أسماء كامل
وسط عالم بقى مليان بالمتطلبات، وناس #سريعة_الحكم، وإنجازات وأعباء فرضناها على نفسنا، بقينا #بننسى ان أبسط أشكال #الدعم ممكن تكون هي طوق النجاة من لخبطتنا دي، ومن توهتنا وسط الصح اللي بقى غلط والغلط اللي بقى هو الصح، وانت عايش طول الوقت بتقاوم وتحاول.
إنك في وسط كل دا تلاقي حد يبصلك بعين كلها حب، دفء وفهم، مش عشان عملت إنجاز كبير لاء، لكن لمجرد إنك بتحاول،، ده في حد ذاته نعمة..
#الحنية ياجماعة مش ضعف والله، والدعم عمره ما كان كماليات أو شيء زيادة عن الحاجة لأ، دا شيء أساسي ومهم زيّه زي الأكل والشرب…
#الكلمة_الطيبة، #الحضن اللي ف وقته، #النظرة اللي بتقول “أنا شايفك ومقدّرك ومؤمن بيك”، كل دول احتياجات أساسية، وكلها أصلًا حاجات صغيرة جدًا بس والله بتزرع في الروح قوة وقدرة بجد مش طبيعية.
الناس اللي بتختار تكون جنبك وأنت لسه في منتصف أو ف أول الطريق، واللي بتفتخر بيك مش علشان خلاص وصلت، لكن علشان بس بتحاول ومكمل، الناس دي هي اللي بتدّديك جناحات، وبيحطوا في قلبك إيمان وقوة تخليك تكمل حتى لو الطريق مرهق وطويل، وجود الناس دي عامل زي نسمة الصيف اللي بتيجي ف عز النار تخليك تقول بعدها ياااه ع الجمال، حاجة كدة بتطبطب على روحك من غير ما تتكلم، وجودهم بيشيل عن كتفك التعب، وبيفكّ عُقد وخنقة في صدرك ماكنتش قادر تفهم مصدرهم ايه!.
#الدعم_الحقيقي ياجماعة مش كلام كبير، ولا مجرد كلمة بدون احساس، ولا حاجة محتاجة إمكانيات صعبة أو مرهقة، الدعم ساعات بيكون فنجان قهوة مع قعدة حلوة تخليك تفضفض بمنتهى الراحة، أو ضحكة بسيطة مع كلمة فخر تقويك في عز تعبك.
#الدعم الحقيقي أفعال بسيطة بتقولك “أنا مصدّقك، أنا حاسس بيك ومكمّل معاك”.
#الحب اللي في صورة #حنية، و #الحنية اللي في صورة #احترام، هما اللي بيخلّوا الإنسان أصلًا يقدر يعيش… مش بس يحاول ويقوم ويكمل.
طبطبوا على بعض ياجماعة ولو بالكلمة الطيبة، والله كلنا محتاجين دا.. حتى ولو أنكرنا.
#أسماء_كامل
