# أسوأ أنواع المشاعر …….

كتب د / حسن اللبان

أسوأ” أنواع من المشاعر ممكن تمر بيها في حياتك …
لما تعيش أطول فترة من عُمرك ” حد مِعطاء جداً ” فَـ تحصد بعد عطاءك ده كله ” إساءة” ..و كأن ذنبك الوحيد إنّك كنت إنسان أكتر من اللازم …
لما تحسّ إن أكبر جريمة عملتها في الحياة إنك “شخص صبور ” بتتحمل كتير و قليل الشكوى .. واللي قُدامك بيستغل صبرك لِصالحه هو ..
لمّا تندم على شعور حلو أو إحساس بالحب حسيته تجاه حد معين نتيجة لمواقفه و تصرّفاته السيئة معاك بإستمرار..
لمّا تحزن وما تلاقيش الإيد اللى تطبطب عليك ..و لو طبطبت النهاردة ما بتكملش معاك بقية العمر نتيجة للظروف .. أو تغيّر النفوس ..
لمّا تعجز إنك تنقذ حد قريب منك من الغرق في متاهات الحياة أو تعجز إنك تمنعه يكمّل في طريق مسدود ..أو تفشل إنّك تحميه من نفسه حتى ..
لمّا تكون بين أهلك وأصحابك وأصدقائك وناسك و رغم كده تحسّ إنك أكتر حد وحيد في الدُنيا و اللي حواليك عبارة عن فراغ ..
و دي اسمها غربة الشعور ..
غربة النفس ؛ المغترب عن نفسه ده حد ضايع بين الفواصل ؛ لا قادر يوصل للشئ اللى بيتمناه ولا قادر يكمل مع شخص بيحبّه ..
مش عارف يلاقي حد ولا شئ ..لأنه في الأساس مش لاقي نفسه محبوس جوا زنزانته ..
لما تعيش قصة حُب وتكتشف في نهايتها إنك كنت مُجرّد كومبارس .. مش ” البطل ” ..كنت مُجرّد مُتفرّج و اتلعب عليك دور البراءة بإحتراف ..والعشق اللى قدمته كان “وهم متوج بالخذلان” ..
لما تعيش الظلم من أقرب الناس ليك ويموت فيك دِفاعك عن نفسك .
لما يسقط يوميا قدامك قناع ورا قناع لأشخاص كنت فاكرهم أغلى هدايا وَصلتك مِن القَدَر ..
و تكتشف إنهم عبارة عن كوكبة من الزيف والخسة
لما يهجرك أقرب الناس لقلبك اللي كنت بتشتكي له من همومك واوجاعك وتلاقيه إختفي فجأة وبعد عنك وعملك بلوك علشان عاوزك نسخة سيئة وإنت حد نظيف وعندك مبادئ ”
لما تلاقي أقرب الناس ليك بتكرهك وتغير منك وتحقد عليك وتتمني زوال النعمة عنك …
لما تلاقي اللي منك بيدوس عليك بالجامد علشان عارف انك طيب ومش هاتزعل…