بقلم الشاعرة / أسماء كامل
أخاف من ايه ؟!
واخاف ازاي!!
وانا قلبي اتوشم بالموت
لا أصبح يبكي على عشرة
ولا يندم على معروف..
ماعدش خلاص بيعرف خوف
وبيرد الأذى بسكووت
بقيت بضحك ف اوجاعي
كمان أدمنت طعم المُر
ولو خطّى الفرح بابي
بضايفه ..
عشان لحظة وأوام هاتمر
أخاف ازاي !!
وانا لوحدي بقيت عزوة
وأهلي العِند والجبروت
بقيت مشهورة بالقسوة
كمان كبري مالوهش حدود
بقيت باتخض م الرحمة
بشوفها مكيدة للخذلان
بقى شكلي شبه إنسان
لكن قلبه ماهوش موجود
أخاف من إيه؟!
وانا واقفة ف وش الريح
عشان يملا الجمود كاسي
في عز ما يبقى قلبي جريح
بدوس ع الجرح بمداسي
عشان يتعلّم العِزّة
وفيه يتجمد الإحساس
وينسى انه كان طيّب
وبيقدر قلوب الناس
أخاف ازاي بقى وانتوا ..
صنعتوا من برائتي حديد
ومات الحب جوايا
صبح سمه في جرحي يزيد
أخاف من ايه!!
واخاف ازااي!!
وانا حقي ف إيدين ديّان
وقالها ربّي ذو العزّة
داين في الحياة ستدان
طبيعي ان الزمن هيدور
وبكرة يكون عليكوا الدور
وحقي هاييجي بالتأكيد
دا مش تهديد
دا من باب الاعتراف بالذنب
واعظم نوع في جلد الذات
هاخاف من ايه؟!
وانا دموعي أبِت تنزل
وقلبي جلدته حد ما مات
#جلد_الذات
#أسماء_كامل
