بقلم / هبه سلطان
النرجسيين طلعوا كتير اوي يا جماعه و حوالينا و اقرب مما نتخيل .. طب ازاي نقدر نعرف الشخص النرجسي ؟
هحاول ابسطها لكام نقطه لو لقيتوهم في الشخص ، يبقي علم احمر و صفاره و سرينه كمان ان الشخص ده سواء راجل او ست هو شخصيه نرجسيه و نخللي بالنا منه قبل ما الطوبه تيجي في المعطوبه
١- الشعور بالأهمية الوهميه و العظمه
العظمة هي السمة المميزة للنرجسية. أكتر من مجرد الغرور ، العظمة هي شعور مش واقعي بالتفوق و التميز و انهم ناس ماجبتهمش ولاده، و مش اي حد هيفهم هما ازاي مهمين … و عايزين دايما يربطوا نفسهم بأشخاص مميزه واماكن معروفه انها ذات مكانه عاليه.
النرجسيون دول ما بيعملوش حاجه عليها القيمه اووي ، بس قطتهم جمل و بيبالغوا اوي في انجازاتهم و صواريخ كدب .. و كل كلامهم هتلاقيه عن الماضي ، عارفين جملة ” ماشفتنيش و انا فورمه ” و اد ايه كانوا نجوم المجتمع و مفيش زيهم و مش هيبقي فيه زيهم
٢- يعيشوا في عالم خيالي يدعم الأوهام بتاعة العظمة بتاعتهم
طبعا لأن الواقع مش في مصلحتهم خالص و مش بيدعم وجهة نظرهم العظيمة عن أنفسهم ، فالنرجسيين بيعيشوا في عالم خيالي زي لا لا لاند كده عشان الأوهام دي بتحميهم من مشاعر الفراغ الداخلي والعار ، عشان كده لو حاولت تخرجهم من العالم الوهمي ده و اي محاوله بتهدد بتفجير بالونة الخيال اللي عايشين فيها الموضوع بيقلب نكد و صمت عقابي و زنجره و ايام سوده.
٣- يتغذوا علي كلمات الاعجاب و الشكر و اد ايه هما مفيش زيهم
إحساس النرجسي بالتفوق شبه البالونه اللي بتفقد الهوا بتاعها شويه بشويه ، لو مفضلتش تنفخ فيها بالدلع و الشكر و الاعجاب تبقي خاين و دسيس …. تدلع و تنفخ تبقي صاحبي و كفاءه.
٤- الشعور انه ضحيه و قدرة رهيبه علي قلب الترابيزه
علي طول هما ضحيه … ضحية اب قاسي او أم مهمله او أخ اناني او مدير اضهدهم او او … المهم في حد شرير في قصتهم و هما ضحيه … و علي فكره مقنعين جداا و عندهم قدره رهيبه فعلا علي قلب المواقف و يجيبوا اللي فيهم فيك .
٥- يستغلوا الناس عادي من غير ما يشعروا بأي ذنب او كسوف
النرجسيون معندهش مشاعر تعاطف و لا حنيه و لا عمرهم بيحسوا بالناس اللي حواليهم ، يببصوا للناس في حياتهم على أنهم أشياء – موجودين لخدمتهم هما بس و لو النرجسي عملك خدمه اعرف انك هتدفع تمنها كتير اووي اووي و انه عملها اصلا عشان عايز يوصل صوره معينه عن نفسه مش اكتر و برضه هتدفع تمن الخدمه دي غالي
٦- النرجسي متنمر من الدرجه الاولي – معروفه دي
بيتنمروا لما بيحسوا بالتهديد من الشخص اللي قدامهم… ممكن يكون شخص عنده ثقه بنفسه او عنده شعبيه او عنده اي حاجه هو حاسس انها احسن منه …. هووب علي طول يقوم مطلع سلاح التنمر و التحقير من الشخص ده
٧- النرجسي بخيل
بخلا اووي يا خاال … النرجسيين بخلا اوي في التعاملات الماليه و بخلا في مشاعرهم عشان اصلا مفيش عندهم ( راجع الفقره رقم ٥ 👆🏻).
علم النفس وقف عاجز امام الشخصيه النرجسيه …. افضل حل انكوا تاخدوا ديلكوا في سنانكوا و تطلعوا تجروا … و لو مش هينفع لأسباب كتير ، يبقي لازم نعرف و نتعلم ازاي نتعامل معاهم و ازاي منخليهمش يكسرونا و نتعافي عشان هي دي فعلا الشخصيات السامه زي ما الكتاب بيقول …. شخصيه سامه بتدخل سم في جسمك و دمك مع كل كلمه و كل تصرف … التعافي طريق مش سهل بس ممكن نبتديه سوا و هنتكلم عنه سوا المره اللي جايه و بالصبر و الدعم بنوصل لبر الأمان .
