كتب / محمد رضا
هقولها واللي يحصل يحصل… !
ليفربول قبل كده غادرته لاعيبة كبيرة، والفريق كان بيكمل وبيكسب وماتأثرش نهائي.
غادر فيرمينو، غادر ساديو ماني، وغادرت أسماء كبيرة، وكل مرة الفريق كان بيعرف يعوض ويكمل طريقه.
وتبقى صلاح وحيداً وجاب الدورى بدرعوا!
وبعد مغادرة صلاح المرة دي الموضوع مختلف تمامًا… لأن اللي غادر مش مجرد لاعب، ده محمد صلاح.
الراجل اللي فضل لوحده في الآخر، وشال الفريق على كتفه، وجابلهم الدوري بمجهودة الاكبر ومع ذلك كانوا بيطبطبوا عليه ويقولوا إن الفريق أكبر من أي لاعب.
لكن أول ما محمد صلاح مشي… ظهر حجم الفراغ اللي سابه.
مغادرة صلاح أثرت على ليفربول بشكل كبير جدًا، ومن غير أي مبالغة.
مبقاش عندك اللاعب اللي حتى لو مش في يومه، مجرد وجوده في الملعب بيجبر أي فريق قدامه يغير حساباته وتكتيكه.
مبقاش عندك اللاعب اللي ممكن في لحظة واحدة يخلق فرصة من لا شيء، يسجل من نصف فرصة، أو يصنع هدف من كرة محدش كان شايف إنها هتطلع منها حاجة.
مبقاش عندك اللاعب اللي وجوده لوحده كان بيعمل ضغط وخوف على دفاع الخصم.
صلاح كان بيدي لليفربول حل إضافي في كل لحظة من المباراة… وده مش سهل تعوضه بصفقة أو صفقتين.
يمكن الإدارة كانت فاكرة إن رحيله هيكون مجرد رحيل لاعب وتعويضه بلاعبين، لكن الحقيقة إنك لما بتفقد لاعب بحجم محمد صلاح، أنت مش بتفقد أهداف وأسيستات بس… أنت بتفقد شخصية، خبرة، حلول، وتأثير كان ظاهر في كل تفاصيل الفريق.
والأيام بتثبت إن صلاح ماكانش مجرد لاعب في ليفربول… صلاح كان جزء أساسي من هوية الفريق. 🔴👑
