كتبت : أية دياب
في أول رد للفنان تامر حسني بعد هجوم الفنانة حلا شيحة عليه و تبرأها من فيلم «مش أنا».
قال تامر حسني عبر صفحته الرسمية بموقع التواصل الاجتماعي فيس بوك : «نهاركم جميل يا أغلى الناس الحقيقة عمري ما بتخيل إني أدخل في نقاش بالشكل دا مع زميل بحترمه و كان في بينا كل خير».
و أضاف : «بما إنك يا حلا كتبتي بوست و أشركتي الجمهور الكريم معانا بدال ما كنتي تكلميني شخصيًا و نتناقش بيني و بينك فأنا مضطر أرد هنا برضو».
و تابع: «أولًا أنا عمري ما وعدتك إن الكليب مش هينزل دا محصلش أصلًا يا حلا مش أنا خالص اللي أوعد و أخلف ، الحقيقة إني احترمت كلامي معاكي و وعدتك أشيل مشاهد تانية طلبتيها و شيلتها بالفعل و شكرتيني عليها و لو حابة تفتكري المشاهد اللي اتشالت بعد إذنك روحي شوفيها في المونتاچ عند الأستاذ عمرو عاكف أو كلميه يبعتهالك كلها موجودة».
و استنكر تامر حسني قائلا: «و بعدين الفيلم بقاله 3 أسابيع في السينمات و الكليب موجود جوه الفيلم ، هو بالنسبالك الحرام إننا ننزل الكليب على اليوتيوب بس ، إنما الكليب يتشاف جوه السينمات عادي؟ ، منطق غريب فعلاً يا حلا ، و بعدين هو مش أنتي اللي مضيتي عقد و تقاضيتي عليه مبلغ كبير عشان الدور دا بعينه ، هو مش إنتي اللي صورتيه و مثلتيه بنفسك و بمنتهى الرضا و لاّ حد أجبرك ؟».
و أكمل تامر حسني كلامه قائلا: «للتوضيح للجمهور الكريم أنا و المخرجه الأستاذه سارة وفيق بعتنالك و كنا بنتحايل عليكي تيجي تشوفي شغلك قبل إصدار الفيلم عشان لو عندك أي ملحوظه تقوليها، ماكنتيش بتردي علينا و تليفوناتك كلها كانت بتقفل في وشنا ، إنتي للأسف يا حلا متعاملتيش صح مع الموقف كان لازم تهتمي بأمرك أكتر من كدا و لو كان ليكي أي طلب تاني كنت هعمله بكل حب إنما إنتي فجأه أختفيتي و مكملتيش تركيب صوتك في الفيلم و لا جيتي تتصوري عشان آفيش الفيلم أصلًا و مخليتيناش نعرف نعمل آفيش مجمع !!! و بقيتي تقفلي تليفوناتك و تكنسلي علينا كلنا و بعدين أي فيلم بيبقى ليه خطه مسبقه في الدعايه و انتي عارفاها كويس و وافقتي عليها و دا كليب رومانسي يعني معقول كنتي عايزه المنتج يشيل كل مشاهدك اللي صورتيها من الكليب و يطلعني بغني و بقول الكلام الرومانسي دا للأستاذ ماجد الكدواني مثلاً هو دا يُعقل ؟؟!!!!!».
و أنهى كلامه قائلا : «أنا زعلان منك جدًا يا حلا على مفردات البوست بتاعك الغير موفقه و مستحيل هرد بطريقتك اللي فيها تجريح و اتهامات باطله ليا احترامًا لحجات كتير يمكن فايتاكي بس مش هتفوتني و علي فكرة أنا واثق أنك عارفة أني مستاهلش منك كدا و هكتفي بالتوضيح دا و ربنا يهدي الجميع و يكتبلك كل الخير اللهم آمين».
و كانت حلا شيحة قد وجهت رسالة قوية إلى تامر قائلة : «أنا اتفاجئت جدا بنزول كليب يجمع فيه مشاهد متفرقة من الفيلم وفي أيام ذي الحجة أيام مباركة و خصوصًا بعد آخر بوست نزلته و وضحت فيه أنا إيه ، اتفاجئت اكتر خصوصًا بعد وعد تامر حسني ليا و تأكيده إنه هيحترم رغبتي و بعض الطلبات اللي طلبتها منه بكل احترام وود الصيف اللي فات و أكدلي إنه حيحترم رغبتي».
و أضافت : «إحنا يمكن نجحنا بمقايس الدنيا بس صدقوني بمقايس ربنا إحنا لم و لن ننجح ، أنا عارفة و متأكدة أن زملائي جواهم خير بس للأسف فتنة الشهرة و النجاح مش بتخلينا نشوف و نقيس الأمور صح ، بتكلم من قلبي الكليب ده ميرضيش ربنا و أنا عيطت لأني شفت نفسي في المشاهد دي ، دي كانت زلة نتيجة ظروف مريت بيها و كلنا بنغلط و لازم نغلط علشان إحنا بشر بس المصيبة أننا بنغفل و بننسى».
و تابعت : “انا مش حتكسف من حد انا تبت من المشاهد دي و هي لا تصح و انا غلطت و بصلح و اهم حاجة ان ربنا يرضى عني لان في الاخر ده اللي حينفعنا مش الشهرة و لا النجاح لا هو مش نجاح أصلا علشان النجاح الحقيقي حاجة تانية خالص احنا اغلبنا ناسينها الا القليل منا، الفن لو بيخلينا نبعد عن منهج ربنا و منبقاش قدوة لولادنا يبقي باطل و ميبقاش فن”.
و واصلت حلا : “احنا كلنا عندنا امتحان في الدنيا دي و حابة افكرك بالفيديو ده يا تامر اللي قولت فيه انا مش بتمنى أموت و أنا مطرب انا دايما خايف من كده ، كلام أكيد قولته في لحظة صدق جواك و جوانا كلنا ، شوفه تاني يمكن يفكرك ان جواك اكيد في صراع و انا و كلنا كلنا بنغلط بس المهم في الاخر نتدارك الغلط و نصلح ، {إِلَّا مَن تَابَ وَءَامَنَ وَعَمِلَ عَمَلࣰا صَـٰلِحࣰا فَأُو۟لَـٰۤىِٕكَ یُبَدِّلُ ٱللَّهُ سَیِّـَٔاتِهِمۡ حَسَنَـٰتࣲۗ وَكَانَ ٱللَّهُ غَفُورࣰا رَّحِیمࣰا} ، الله على كلام الله و جماله يا سلام لو أصواتنا و مواهبنا كلها نستعملها في الخير عشان يبقى فن بجد”.
