كتب / حسن اللبان
دايما لما بنتكلم عن الإبداع في التمثيل لازم يحضر أحمد زكي ونور الشريف ، ولازم يتم استبعاد عادل إمام ، وكأننا عاوزين نقوله أنت لا ، نجاحك الساحق كنجم شباك عشرات السنين سينما ومسرح مش هيخلينا نعترفلك بالابداع ، زي ما يكون بنغير على أحمد زكي ونور الشريف منه !!
لكن للإنصاف بقى عادل إمام حالة عظيمة في تاريخ التمثيل المصري بلا شك ، حالة متفردة أكبر من لقب الزعيم اللي اطلقته القنوات والصحف عليه لمجرد إنه صادف اسم مسرحية ليه مشهورة.
وعلى الرغم من عشقي لأحمد زكي ونور الشريف وهيامي بقدرتهم على التمثيل إلا إني بعتبر عادل إمام مساوي تماما ليهم في الموهبة ، لكنه بيتميز عليهم في إنه أذكى بكتير ، وأحيانا بعتبره أذكى ممثل مصري على الإطلاق ، ودا سبب ساعد بجانب موهبته الكبيرة إنه يكون أكثرهم شهرة وسيطرة على شباك التذاكر لعقود كاملة.
اختيار عادل إمام لشخصياته بصراحة حاجة لازم تدّرّس ، أتصور إن مفيش ممثل جسّد رجل الشارع العادي والشخصيات العادية الغير مميزة وتماهى معاها وعطاها عمق زيه.
عادة الممثل بيروح للشخصية المميزة عشان يجسدها ، لأن الشخصية المميزة جواها تعقيدات وتراكيب بتتيح للممثل مساحة كبيرة يقدر يتحرك جواها عشان يبدع ، لكن عادل إمام كان العكس تماما ، هو كان بيروح للشخصية العادية فبيميزها ويديها عمق وأبعاد مكناش شايفينه ، وعشان كدا عادل إمام قدر يخطف وبشكل مستمر رجل الشارع العادي أكتر من النخبوي ويبهره ، وفي البدلة الجينز والكوتش لمحة توضحلنا جزء من الاصرار دا.
عادل إمام في أفلام مثل (الحريف وحتى لا يطير الدخان والمشبوه وخلي بالك من عقلك وحب في الزنزانة والإنسان يعيش مرة واحدة والغول ..) اثبت إن عبقريته أكبر بكتير من كونه كوميديان بيضحكنا حد الهيستريا وضرب كف على كف ، وانه فعلا يمتلك من القدرة اللي يخليه يبدع في أي لون تاني حتى عكس المشهور بيه تماما ، لكن كان واضح إنه واقع في غرام الكوميديا لأنه أعطته أكتر من اللي يتمناه يمكن.
ولما تخلى عن الكوميديا في مثل الأفلام دي استطاع انه يضاهي قدرة أحمد زكي في التقمص والموهبة ، ونور الشريف في الصنعة والشطارة ، وممكن نقول عادي إنه تفوق أحيانا كمان برغم عظمة الاتنين الراحلين عليهم رحمة الله.
وكل اللي قلته دا معروف أكيد للغالبية ، لكن اللي حابب اقوله زيادة إن الموسيقى التصويرية لأفلام عادل إمام الغير كوميدية مخدتش حقها كفاية في الكلام عنها ، وأقل ما يقال عنها إنها عظيمة وبلغت الغاية في التعبير ، ومعرفش هل عادل إمام ليه دخل كنجم شباك وديكتاتور – زي ما بنسمع – في المشاركة في اختيارها ولا لا ، ولو ليه دخل يبقى فعلا استحق العظمة في التذوق عن جدارة.
قبل إنها كموسيقى مجردة رائعة فعلا ، لكن كانت بمثابة بطل مساعد في أفلامه ، بطل خفي مبيظهرش في الكادر ، لكنه حاضر في كل مشهد ، ولا يكتمل المشهد بغيابه.
فمثلا في فيلم حتى لا يطير الدخان هتلاقي إن الموسيقى التصويرية للفيلم للدكتور جمال سلامة اللي يُقال انه مقتبسها من موسيقى فيلم الرجل الثاني للموسيقار أندريه رايدر مش مجرد موسيقى ، لكنها شخصية حاضرة غير مرئية بتخليك تبكي وتنفعل وتحفزك قبل عادل إمام.
وفي خلي بالك من عقلك أتصور انه نقدر نستغني عن الحوار ونكتفي بنظرات عادل إمام وانفعالاته بس بجانب موسيقى عمر خيرت ، فانفعالات موسيقاه كانت بتتنافس مع انفعالات عادل امام بشكل مدهش.
وفي الفيلم دا تحديدا عادل إمام عمل مشهد يستحق على الأوسكار والله ، لما شيريهان اتخانقت مع احمد بدير وعادل أمام فضل يهدي شيريهان وهي تصرخ وتقول سامع بيقولوا عليا ايه ، بيقولوا عليا مجنونة ، وتحرضه على الخروج لهم فانفعل عادل امام وفضل يصرخ ويكسر في الشقة وفي نهاية الانفعال دا بدأت الموسيقى تتداخل بهدوء مع المشهد ، كانت حاجة عبقرية فعلا.
وفي الحريف بشوف إن موسيقى هاني شنودة لو تجسدت بطلا في الفيلم لنافس عادل امام ، كان هيكون أغرب بطل قادر على إشعار الجميع بالدفء ، عمري ما شعرت إن فيه موسيقى بتشعرني بالدفء المادي المحسوس والمعنى وبتشعرني بحنين للماضي زي موسيقى هاني شنودة عموما وخاصة في أفلامه مع عادل إمام.
طبعا اللي عمله عمار الشريعي في حب في الزنزانة يخلينا نفهم يعني ايه حد بيشوف بقلبه ، لو انت مشفتش الفيلم هتخمن أحداثه من دقة التعبير الموسيقي للفيلم.
عادل إمام قادر على إنه يُبكيك زي قدرته على أنه يضحكك بالظبط.
عاوز تعرف عادل امام واصل للناس ازاي وقد ايه فعلا ، بص لحملات التشويه ليه على مدار السنوات ، ورغم كل دا مقدرتش تعمل حاجة معاه ولا انها تقلل حب الناس لاعماله.
