بقلم : منال فهمى
خلينا متفقين ان الراجل لما يتجوز على مراته بيتجوز لسبب جنسي بحت .. ليس بسبب ان واحده شافها فى الشارع فعجبته و عاوز يجدد و يغير الأستاذ كأنه بيغير فى شرابات و بردو هيجي يوم و يزهق من التانيه و هيبقي عاوز التالته و مش هتكفيه و لا 100 واحده .. لان دي للأسف طبيعة الرجل الا من رحم ربى و الا اللي بيعرف يتحكم فى غرايزه .. من الاخر بيكون عاوز عشيقه جديده فى اطار شرعي و ساعتها الحلال و الشرع اللي بيتحجج بيهم بيتحولوا لحاجه حرام لان مش ده السبب اللي ربنا حلل بيه التعدد فمتفرحش اوى لأنك مش هتعرف تعدل كمان القرآن قالها صريح “و لن تستطيعوا ان تعدلوا بين النساء و لو حرصتم” هتيجى يوم القيامة شقك مائل و مش هتستحمل العذاب والله .. خلينا متفقين ان لو طبقنا الشرع بحذافيره على الرجل و الست والله والله الرجالة اللي هتزعل و تعالى اقولك أزاي .. يعنى مثلا : **زوجتك مش مجبره تساعدك ماديا حتى لو مليونيرة و انت مش لاقى تأكل و مع ذلك بتساعدك .. **زوجتك مش ملزمه بخدمتك و لا تطبخلك و لا تنضفلك بيتك باتفاق الأئمة الأربعة الزوجة للدلع و الحب و الحنان و عشان تجيبلك نسل و تعفك عن الحرام و مع ذلك بتعمل كل ده .. **زوجتك مش ملزمه ترضع اولادك و شرعا المفروض تجيب مرضعه ليهم زي أيام الرسول ما كانوا بيعملوا و مع ذلك بترضعهم .. **زوجتك من حقها تطلق منك لو انت مش بتخلف لان من حقها تكون ام و مع ذلك بتفضل معاك للأخر .. **زوجتك من حقها عدم خدمتها لأهلك حتى لو كلهم تعبانين و مش قادرين يخدموا نفسهم و مع ذلك بتخدمهم .. **زوجتك من حقها انها تقاطع اهلك لو بيضايقوها و مش هيبقي حرام عليها لانهم مش من زوى رحم ليها و مع ذلك مستحمله كلام و معامله وحشه الا من رحم ربى طبعا عشان البيت يقف و عشان خاطرك .. شوف هي متنازله عن كام حلال و كام شرع من حقها علشان خاطرك و انت مش راضي تتنازل عن شرع واحد عشان خاطرها .. لو حضرتك حسيت بملل من مراتك اكيد هي كمان بتحس بده .. و لو حسيت انها كبرت اكيد انت كمان كبرت .. و لو حسيت انها تخنت و مبقتش جميله زي الأول اكيد انت كمان تخنت و مبقتش زي الأول .. مهو حضرتك مش شاروخان و لا رشدي أباظة يا دلوع مامتك يعنى .. و مع ذلك الزوجة عندها استعداد تتقبلك بعيوبك و بنواقصك و عندها استعداد تعيش معاك بدل العمر عمرين .. فمن الانصاف انك انت كمان تتقبل نواقصها يا راجل يا محترم .. و لو معاك قرشين و حازقينك قوى بدال ما تتجوز بيهم دلع بيهم مراتك و هاتلها لبس و دهب و ميك اب و وديها كوافير و جيم تهتم بنفسها و ببشرتها و جسمها و شعرها و هي هتبقى احلى من أي واحده و مش هتضطر تتجوز تاني.
