بقلم / أسماء كامل
#بركان_غضب
بركان بيغلي من سنين
كاتم في نيران الغضب
لو مسّه بس أيادي بور ..
راح يقلب الصمت لصخب
هيخلي ليله الهادي نار
و يقلب الأيام دمار
حتى العمار .. هيهد فيه
ويشيل بإيده
كل عمدان شدها
وكل لحظِة حب منّه
بقلب راضي وحطّها ..
هيهدها.
ويزرع الأيام شقوق
وكل قلب سقاله جرح
بنفس كاسه راح يدوق
حبِّة هدوووء✋🏻
واسمعوا الحكم الأخير
انا عمري كله ضاع هدر
وقلبي للأحزان أسير
فين الضمير؟؟
مش ناوية اكمل سكتي
تاني ف عذاب
ولا قادرة اشوف
أحلام سنيني ف.نظرته.
بسهولة تتحول سراب
أصل الخرااب…
بيمحي فرحة بين سنيني
رغم حزني صنعتها
وكل لهفة جوّة قلبي
بكُل كِبر قتلتها
وهيحسها..
لما يلقى الدنيا جاية
وقايدة أيامه بنيران
واما يلقى اللي جاي ناوي
يدوقه طعم الحرمان
وهقول كماااان
أمان وضايع من سنيني
وطول حياتي بمثله
تظهر ملامحي بالسعادة
ووجعي لازمً أركنه
وبحِن له..
قلبي اللي مزروع وسط شوك
يتمنى تفرح دنيته
ونفسه بس ف يوم يفوق
ويدوق جمال حنيته
واهو موته..
بطبع متعود يعيش
ياخد ويغرف م الحنان
واما اعوزه يقول مفيش
وقلبه أفقر م الزمان
سنين حرمان
عشت عمري أداري فيه
ومبيّنة الورد الحزين
رابطة جوّة دموعي ضحكة
وحزني عايشاه ك.السجين
سنين وتايهه بين ملامحي
وعمر مسروق فرحته
نفسي افك قيود فرضها
ضعف طبعي ورقته
بركان ف.قلبي من سنين.
ونفسي احرر كتمته
#بركان_غضب
#أسماء_كامل
