كتبت / سلوى لطفي
يا تري ايه فرصة أتنين فنانين مكنش ليهم قبل كدا أي حضور كوميدي علي الشاشة زي ممدوح عبد العليم واثار الحكيم انهم يعملوا فيلم من انجح افلام الكوميديا زي فيلم بطل من ورق سنة 1988 …اعتقد هوا هوا نفس اللي حصل مع يوسف وهبي وعمر الشريف لما المخرج الكبير فطين عبد الوهاب سنة 1960 قرر يخرج عن المألوف ويختار أتنين أبعد ما يكونوا عن الكوميديا و يسند ليهم دور (عبد القادر النشاشجي) و دور( حسين ) فـ فيلم (اشاعة حب) والفيلمين نجحوا جدا و أصبحوا من أنجح افلام الكوميديا في السينما المصرية
و دي نفس النتيجة المبهرة اللي بنشوفها لما بيحصل العكس والمخرج بيختار ممثل كوميدي في دور تراجيدي زي ما حصل مع عبد المنعم مدبولي فـ فيلم أحنا بتوع الاتوبيس ومحمد سعد فـ فيلم الكنز وهاني رمزي فـ فيلم 200 جنيه وغيرهم كتير و ده يوصلنا لحاجة مهمة جدا وهي إنه أحياناً المغامرة والخروج عن المألوف و رؤية المخرج للممثل بطريقة برا الصندوق بتطلع لنا نتايج عظيمة و أداء مبهر أول مرة نشوفه من الممثل ده في الحتة دي تحديداً مع انه هوا هوا نفس الممثل بس مع مخرج تاني
يقال أن المرشح الأول لدور عمر الشريف كان إسماعيل ياسين لكنه إعتذر بسب إنشغاله بأعمال تانية والمرشح الأول لدور ممدوح عبد العليم كان احمد زكي لكنه إعتذر لأنه كان عايز يعمل فالتوقيت ده دور جد و مختلف و ده لانه كان لسه عامل قبلها فيلمين كوميدي “البيه البواب”، و”أربعة في مهمة رسمية” في نفس التوقيت وكان عايز يغير في نوعية ادواره
