كتبت / منال خطاب
أحمد زكي قبل فيلم البريء كان له فيلم في السوق ومكسر الدنيا إسمه النمر الأسود ومحمود عبد العزيز كمان كان له فيلم في السوق ومكسر الدنيا هو كمان إسمه إعدام ميت ومحمود عبد العزيز في الوقت ده كان نجمه اعلي من أحمد زكي وده بيبان من اخر أجر تقاضاه كل منهم عن اخر فيلم له يعني محمود عبد العزيز خد عن فيلم إعدام ميت ٢٥ ألف جنيه في حين أن أحمد زكي تقاضي عن فيلم النمر الاسود ١٠ آلاف جنيه يعني تقريبا أجر محمود مرة ونص أحمد زكي طب فيلم البرئ البطل الرئيسي بتاعه هو أحمد زكي فإزاي هنقنع محمود عبد العزيز أنه يكون بطل تاني او ال villain لأحمد زكي وازاي البطل التاني يأخد فلوس أكثر من بطل الفيلم وهنا حلها المنتج الفني صفوت غطاس واجتمع بمحمود بمفرده وقاله إحنا مش شايفين حد غيرك في الفيلم ويمكن الدور مش كبير بس في مساحات تمثيلية محدش هيعرف يعملها غيرك فرد محمود وقاله وانا معنديش مانع بس انا أجري ٣٠ ألف جنية قاله لا أنا عارف إن آخر فيلم لك خدت ٢٥ ألف فأنا هديك ٢٦ ألف، مرضي يا صاحبي قاله مرضي.
وراح لأحمد زكي وقاله طلباتك قاله أنا مش هأخد أقل من ١٥ ألف جنيه قاله وانا هديك ٢٥ ألف قاله كام قاله ٢٥ ألف أنا اتفقت مع محمود أنه هياخد ٢٥ وانت ٢٥ ألف زيه، وقاله مرضي يا صاحبي قاله مرضي.
في حين تقاضي كل من السيناريست وحيد حامد ١٢ ألف جنية نظير السيناريو والمخرج عاطف الطيب ١١ ألف جنيه.
نيجي بقي لدور جميل راتب وكان الترشيح الاول د جلال الشرقاوي فالمنتج صفوت غطاس قال للمخرج طب ما نجيب جميل راتب فرد عليه المخرج عاطف الطيب وقاله وهو هيرضي بعد ما كان بيعمل دور البطولة التانية مع سعاد حسني وعادل إمام نجيبه يعمل دور صغير وكمان في مشهد س*حل فصفوت غطاس قاله ملكش فيه جميل صحبي وهيجي وفعلاً بيجي جميل راتب يعمل الفيلم فبقي عندك فيلم تأليف وحيد حامد وإخراج عاطف الطيب وبطولة أحمد زكي ومحمود عبد العزيز وممدوح عبد العليم وجميل راتب وصلاح قابيل ده غير عم حسن حسني رحمه الله عليهم أجمعين يعني فاضل نور الشريف ويحي الفخراني ومحمود يس ويبقي معظم نجوم السينما في الفيلم والفيلم يتصرف عليه ميزانية ضخمة لكن الداخلية والرقابة تعترض عليه وتمنع نزوله ويفضل الفيلم ممنوع من العرض من سنة١٩٨٦ الي سنة ٢٠٠٥ لحد ما يتعرض مرة أخرى علي هامش أحد المهرجانات.
في حاجتين ذكرهم ا صفوت غطاس في اللقاء وهو أن أحمد زكي كان حزين في الفيلم ده وحالته النفسية كانت سيئة لأنه كان في إجراءات طلاقه من حب عمره هالة فؤاد
الشئ التاني أن نور الشريف كان عايز يعمل دور أحمد زكي وعلاقة نور وعاطف الطيب قوية جداً ويكفي إني اقولك أن أول فيلمين لعاطف الطيب كانوا بطولة نور الشريف وهما الغيرة القاتلة وسواق الاتوبيس ولكن لأن نور مكنش هيليق علي الدور زي أحمد زكي تم استبعاد نور الشريف .
