# انسحابي جيه في وقته …. شعر

بقلم د / حسن اللبان

انسحابي جيه في وقته كل فجر وله أذان
مش هقولك قلبي خنته
مش هراهن عالزمان
مش هراهن عالأماني أو في يوم ترجعلي ثاني
أو كلام في الحب قلته
انسحابي جيه في وقته

وابتدا يدبل هوانا وانت بتضيع من ايدي
ايوه حسيت بالخيانة قبل ما شوفها بعني
عمري ما احساسي خاني
غصب عني سبقني ظني والخداع في عينيك لمحته
انسحابي جيه في وقته

انسحبت وقبل ما امشي جيت اقولك وانت عارف
كنت بين جفني ورمشي نور ياريتك كنت شايف
لو يضيع عمري اللي باقي مش راح اجرح كبريائي
كل باب في هواك قفلته
انسحابي جيه في وقته