بقلم / اسماء كامل
في كدة إحساس لما يجيلك.. بتشيب الروح
بيبدل طبعك تركيبك ومالوهش وضوح
بيشقلب حالك ترتيبك وماهوش مشروح
ولا عارف تبكي ولا تضحك ولا عنه تبوح
إحساس بيخلي الروح تسرح في مدار الكون
إحساس فيه راحة..
فيه فرحة.. مايل لجنون
بيخلي العقل من الدهشة يبقاش موزون
والفكر بيسأل دا مِنَّة!!
ولَّا دا ملعون؟
إحساس متخلَّط بالدمع مخليك مذهول
وتلاقي الطيب بين ضلعك بالوقت ينول
وكأنه بيفتح لسنينك باب كان مقفول
أوم يسأل قلبك تفكيرك..
هو دا معقول ؟!
إحساس وبتبدأ من عنده وتتشق الروح
ف تنبِّت أزهارك ثمرة وعطورها تفوح
أشواكها مخالب مطلية ومروية جروح
بتحارب ضعفك وتحول كسرك لطموح
إحساس بالراحة المطلوبة ومكسية دموع
بتخليك حاير مش فاهم مغزى الموضوع
وبتدعي لربك وليلاتي بتقيد ف شموع
تركعله براحة وعيونك تبكيله خشوع
#شَق_الروح
#أسماء_كامل
من #ديوان #شَق_الروح
قريبا في #معرض_القاهرة_الدولي_للكتاب2024
