# #بهواه_انا….. شعر

بقلم / أسماء كامل

وحتى لسانه سبق لساني بالغرام
وبكلمة منه فتَّحِت شبابيك أمل
ايه العمل؟؟!
صبري خلاص مش محتمل
يا عُمر قلبي اللي اكتمل
يادنيا طايرة في السما بالشوق
ياقلب عاشق .. وانا المعشوق
طب بص فوق!!!
هاتلاقى عيوني بصالك.. وغزلالك
نجومها حنان
تدفيلك أمل بردان
وبشوق سهران..
تروي بساتين الزمن أفراح
ياقلب براح..
ياقلب براحه دفَّاني
ياروح انفاسها عايشاني
وسكناني..
بنظرات الهيام منّك
دا قلبي تملّي بيقولك..
أنا منّك
انا الحتَّة اللّي من روحك.
يا همسي دوايا من بوحك
أنا روحك.
ياكل خطوة وخداني ل لُقاك
يا دنيا عايشة ف سحرها ويّاك.
بعدين معاك؟!
بعشق هواك، بتنفسه
بيجري جوة قلبي والوريد
قلبي العنيد..
كاتم ف نبضه بيحبسه
ولما طيفك عدّى جنبي..
وقال يفكّر يوصفه!
لقتني طابَّة فيه ومستسلمة.
وفجأة روحه كات فقلبي معلمة
ومسلِّمة لبركان هواه
طالبة لرضاه
بتمنى عمري الجاي كله يكون معاه
يادنيا مغموسة برضا..
ياقلبي أنا قلبي ارتضى
وقال دا فجر العمر
شقشق من جديد
قلبي خلاص في دنيته
مابقاش وحيد
قلبي الجديد.. بيعشقه.
من كل الدنيا هيسرقه
ويدوقه..
من كل انواع الهنا
بهواه انا.

#بهواه_انا
#أسماء_كامل
#ديوان
#شُفتك_في_الحلم_حلم
#معرض_القاهرة_الدولي_للكتاب2024