كتب / حسن اللبان
بتقول الدكتورة نعمات أحمد فؤاد ، في كتاب “أم كلثوم وعصر من الفن” إن القوات البريطانية في مصر حبت تستفيد من نجاح النجمة البريطانية الشهيرة (فيفيان لي) بطلة فيلم “ذهب مع الريح” بعد تحقيق الفيلم شهرة ونجاح كبير في كل دول العالم فوجهوا لها دعوة لزيارة القاهرة ، واتفقوا معاها على إحياء حفل مسرحي ترفيهي للجنود الانجليز على مسرح الأزبكية ، لكن المشكلة كانت إن المعاد اللي اتفقوا عليه هو الخميس الأول من الشهر ، وده ميعاد حفلة أم كلثوم الشهرية ، فقرر الإنجليز تأجيل العرض بتاع فيفيان إلى ميعاد آخر خوفًا من إنه تحصل مشاكل مع المصريين اللي كانوا بينتظروا حفلة الست زي العيد ، ولما عرفت “فيفيان الكلام ده سألت مين أم كلثوم اللي بريطانيا العظمى خايفة من استثارتها وغضب جمهورها، فقررت إنها تحضر بنفسها حفلة الست..
ولما خرجت من المسرح بعد الحفلة قالت حاجة واحدة عن كوكب الشرق : ” إنها معجزة من معجزات الدنيا “
