بقلم / دعاء راجح
مش كل انسان نرتبط بيه عاطفيا او رسميا بخطوبة او بصداقة يبقى بيحبك
لو الحبيب “لا يحترمك”
لايحترم آرائك
لايحترم اختياراتك
لايحترم شخصيتك
لايحترم انجازاتك
لايحترم احتياجاتك
يبقى دا مش حب
لو الحبيب “مش داعم ” فى أوقات الضعف و الاحتياج
لو دايما بيتهرب منك و يختلق الأعذار
لو بيتضايق انك بتفضفض معاه و مش عاوز يسمعك
لو معندوش استعداد يساعدك لو احتجت المساعدة العملية
لو بيحبك بس و انت فى حالة نفسية جيدة و يبعد عنك لو العكس
يبقى دا مش حب
لو حبيبك “دايما يعمل مشاكل” بدل ما يحل المشاكل
لما تعمل غلطة يمسكها لك
لو اتصرفت على غير المتوقع تبقى حكاية و رواية
لو اتصرفت خلاف رغباته و الى هو عاوزه يبقى مصيبة
دايما بيلومك و يعنفك
دايما يعمل دراما بدل مايحاول يهدى و يحتوى الموقف
دا مش حب
لو حبيبك معندوش استعداد “يعرفك”
هتلاقيه دايما بيتكلم عن نفسه هو بس عاوزك تعرفه
و تعرف طلباته و هو عاوز ايه
لكن لابيسألك عن أحوالك
و لا بيطمن عليك
و لا بيحاول يسمعك و يشاركك أفراحك و أحزانك
و لا عاوز يعرف عنك حاجة
دا مش حب
لو حبيبك معندوش استعداد “يضحى” علشانك أحيانا
اى اتنين فى الدنيا مختلفين عن بعض
و الطلبات و الاحتياجات مؤكد هتكون مختلفة
لو هو معندوش اى استعداد للتنازل علشان خاطرك يبقى دا مش حب
و لو انت برده مش حاسس بكدة تجاه من “تدّعِى” انك بتحبه يبقى انت مش بتحبه
ممكن العلاقة يتحط لها أى مسمى تانى
لكنه مؤكد ليس بحب
سواء كان منك أو منه.
