بقلم / أسماء كامل
#أقسمت☝🏻بوجعي ان انا قلبي
ما يداوي جراحه ف يوم غيري
وهغير روحي اللي تملّي
تضعف ف يتوه مني دليلي
دا القلب خلاص بقى متشكّل
على انه يعيش دايما باللين
والدمعة البايتة على جفونه
في ملامحه بترسم خط حنين
ف.بعدت وخدت حنان قلبي
وقسيت على كل اللي آذاني..
وضربت العالم ١٠٠ صرمة
ما انا أصلًا كدة كدة وحداني
واهو دُست الدنيا برجليا
والفرح وضعته أساس ليا
لا هاكـبّر مرّة واقول عادي
والجاي قررت يكون ليا
ما الدنيا أساسًا متاخدة
واقفلنا ياقلبي على الواحدة
لا بتعرف معنى لحنيّة
وسكّتنا ماليتها قلوب جاحدة
والجاحد واحد مافهمشي
ولا حس ان القلب أمانة
دا بيظلم ويقول ماظلمشي
ف. هغير ترتيب الخانة
وهانفّذ قسمي اللي قسمته
وهداوي القلب اللي وجعته
وبإيدي هافرّح أحزانه
والظالم فينا يشيل شيلته
#أسماء_كامل
