بقلم / ايناس السيد
صوتى ضعيف
…………..
صوتى ضعيف
جاى من فصل الخريف
لكنه مليان بالشجن
وكلام سنين عمره اتسجن
وعشان كده كلامه حقيقى
انا صوتى مفتاح للزمن
أيوة الزمن.. اللى تتمنوا يعود
كل اللى مَر
قسوة ومُر
وبُكا مغلوب كان نفسه يصرخ
وكأنه حلم ..الصوت بحزن غاب واتنبح
من كتر ما أصله اندبح
صوتى ضعيف لكنه ماصابوش الوََهََن
هو من الظلم اتطحن
بيقاوم الناس الغريبة اللى مبيناله طيبة
لكنها كده فى الحقيقة بتتمناله يختفى
او ينطفى يفضل يدور ع السبب لما حِفى
أصبح ضعيف
مش بس لأنه جاى من الخريف
لكن عشان الأحزان داست عليه
وكل ما يسألها ليه
يلقى ساعتها ان الحمول كترت أكتر وأكتر عليه
أنا صوتى شاب راكب حصان
على راسه كاب
وأصغر منكم كلكم لكنكم مستخسرين فيا الحياة
كان كل أملى تشعروا الحب الكبير
ساعتها بس هتعرفوا
ان الشجر لو حتى الأوراق تتركه
يفضل أصيل
يستنى لما يعود ربيع يفضل ينادى عليه من غير ملل
لما يجيه
بصوته الضعيف
