#بـ_١٠٠_راجل …… شعر

بقلم / أسماء كامل

#مجنونة ف وقت الفرح ووقت الجد
بكون 100 راجل
مابحبش قيل وقال
مش خوف بس انا مش غاوية مشاكل
أنا عندي أحب الخير للناس
أفضل من إني اتشاكل
دي الكلمة الحلوة بترضي الروح
حتى لو العقل اتاكل

أنا كل اللي يهمني حالي
وف حالي انا كدة برتاح
والضحكة ف وش حبيب أو حتى غريب
بتكون لي سلاح
دي الروح الحلوة مابين الناس
أخطر من ميت سفاح
ماهي أصل حياتنا ماهيش ناقصة
نقضيها ف أسى وجراح

أنا ست ف وقت الشِدة بتبقى ف ضهرك
أجدع حيط 👌🏻
وف وقت الشقى تلقى ف حضنها
حنيِة أهل وبيت
وقوية ف وش الدنيا تحارب
لو قالت حبيت
وان مرة حاولت انك تكسرها
على نفسك وجنيت 🤨

أنا أم تملي بضم واطيب أي جراح
في ولادي
وان قرب منهم شر ف يوم
ولا دنيا تسد قصادي
فبلاش تعاديني أو ترازيني ف مرة
من النحيادي
صدقني ساعتها بكون جبروت
لو جت لي الدنيا تراضي

طيبة وبشوشة بحب الناس
وبطيّب خاطر الغير
مشكلتي تملي دموعي وحتة زيادة
من التقدير
عفوية ف دنيا قويّة وطبعي اكيد
محتاج تغيير
بس انا بتمنى أشوف الدنيا
يكون في اساسها الخير ،،،

#بـ_١٠٠_راجل
#أسماء_كامل