بقلم / أسماء كامل
لما قلت اني بحبه❤️
راح سألني قد ايه !
قلت قد الشوق ف قلبه
قد راحتي مابين ايديه
قد عمره اللي وهبني
وقد صورتي اللي ف عينيه
ماانا قد ايه حلوة ف عينيه.
بحس انه شايفني طير
مفرود جناحه في الفضا
وصوتي يشفي ميت عليل
قاعد ومستني القضى
قلبي ابتدا ..
يعشق ملامح دقته
ويعيش تفاصيل جنته
حنيته..
فردت لعمري سنين هوا
قلبي ارتوى
صبح الدوا لكل الندوب
اللي كانت جوّة روحي معششة
ومفشفشة أجمل تفاصيل فرحتي
دي ضحكتي..
صبحت له وصفة
بتشفي عُمر من الجراح
وغنوة رايقة ف لحنها..
العمر بيشقشق صباح
دا شايفني قلب الكون بحاله
وهو ..
هوَّ ف الدروب سواح
قلبه البراح…
بيساع من الاحساس صنوف
عايش يشوف
ويسأل ع السعادة طريقها فين
لجل يوصفها لعيوني
دي كمان جفوني..
صبحت له حضن من الأمان
ترتاح عيونه ف ضلها.
ما انا قولتها…
الضحكة دي إنت السبب في ضيَّها
ملامحي تملي بتنور
من كلمة عني كتبتها
يا ابو قلب عمران بالحنان
يا عمر بيوهبني الأمان
ماتقول كمان..
