بقلم / أسماء كامل
#كلام_يشبه_للشِّعر
فكَّرت اترجم إحساسي..
بكلام موزون يشبه للشِّعر
فمسكت بقلمي وكراسي..
بس اكتب بقى على أيُّها بحر؟!
أو فين البحر اللي يساعني؟!
ويساع الحرف اللي كاويني
وانا بحر العشق ملوعني
بتفعيلة بتجري ف شراييني
ومجاز الشوق غرقان فيّا
والقلب سفينته الحنيّة
والنبض يأدِّف ويحارِب
دوّامة موت مالهاش ديَّة
حضَّرت الحرف ورا التاني..
ف.لقيت القلب الوحداني
متآنِس بالمعنى وحافظه!!
والشرح بيجري على لساني
والسِّن بيحلف ماهو لافظُه!!
ماهو أصله مجرب ذُل البوح
مش ناوي خلاص ييجي ولا يروح
متعايش في حياته الهادية
بلا شوق ودموع وحاجات فاضية
ماخلاص كفِّينا ووفِّينا
وعملنا كمان فوق ما علينا
من جرح اوراقنا استكفينا
والقلب خلاص بطّل إحساس
وان جاله ف مرة شيطان الشِّعر
راح يكتب كدة شخبطة وخلاص
ماهو ياما غرِق في بحور بتغُر
أشواق وجراح .. إخلاص مع غدر
كل اما يقول راح نرسى خلاص
يظهرله سراب يشبه للبَر
زي الإحساس لو يوم يخرج
يخرج في كلام يشبِه للشِعر
#أسماء_كامل
