بقلم / أسماء كامل
#قلبي مابقاش مشدود الحيل
علشان ما يطبطب ويهاتي
ولا عقلي كمان قادر يهدى
من دوشة تفكيره ليلاتي
حتى حياتي …
صبحت مسجونة ف حزن طويل
وحصاره بيلحِم ليل ورا ليل
مع لوم وعتاب ما اعرفله سبيل
وانا كاتمة الحيرة ف عِبَاراتي
تايهة ليلاتي ..
وتوهاني صبح لايامي صديق
بدموع ببلعها ف وسط الريق
كتماها عشان ما نقلش الهم
مانا عارفة ماحدش ناقص غم
ولا حد كمان أصبح مهتم!!
بس اهي أقدار
الليل يتنكّر يبقى نهار
لكن جوّاه عتمة طبعه
بسواده المنقوش في ملامحه
راكن جرحه .. جوايا ودايما ملازمني
وانا حالي الحالِك متهالك
مستني الأيام تسندني
وتعودني..
على طعم الحيرة ف حلق الروح
وآهات لا بتخرج تتحرر
ولا حتى سكوتها بيشفى جروح
دايما مبحوح..
آه يا صوت العمر اللي مسافر
لمحطة بترفض تسكنَّـا
آه يا حِس الطير اللي مهاجر
بيدور على عِش يزينَّـا
ويأمِّـنَّا..
من غدر العمر اللي مغادر
ومودّع فينا الأيام
من صوت القلب ال مش قادر
لا يعارضه ولا يقوله سلام
وكمان مِتلام…
