بقلم دكتورة / آمال ابراهيم
شادية اتجوزت عماد حمدي وهو أكبر منها ب 26 سنة واتطلقت منه بعدها بحوالي 3 سنين (ويقال أن السبب الرئيسي للطلاق انه ضربها بالقلم ف أحد المناسبات العامة ) .. ف نفس الوقت اللي فريد الأطرش كان أنهي علاقته بسامية جمال تماما بعد قصة حب طويلة ، وتشاء الأقدار أن الثنائي شادية وفريد الأطرش يحبو بعض ويتفقو علي كل تفاصيل الجواز .. وفجأة وبدون اي مقدمات انتهت علاقة شادية بفريد الأطرش قبل ما تبدأ !!
شادية كانت ست بيت شاطرة بتميل للأستقرار ، وفريد كان متعود علي السهر والرحلات وده خلي فريد يحاول اكتر من مرة إنه يغير سلوكه بس ما قدرش وكان دايما ف صراع نفسي ما بين حبه الشديد لشادية وحبه لطريقة حياته اللي اتعود عليها ، لغاية ما قرر انه فعلا يتغير عشان خاطر عيون شادية ، وبالفعل سافر لفرنسا عشان يعمل شوية فحوصات طبية علي أساس أنه يرجع ويتقدملها بشكل رسمي
ف الرحلة دي بالذات فريد حب يودع حياته القديمة اللي اتعود عليها وعشان كده كان مقضيها سهر وفرفشة علي أساس أن دي تكون المرة الأخيرة اللي هيعمل فيها كده وبعد كده هيعيش حياة جديدة مليانة حب واستقرار
ف الوقت ده بدأت أخبار فريد توصل لشادية وده سبب الم كبير ليها وخلاها تفقد الثقة تماما فيه بعد ما كانت بدأت فعلا تستعد لجوازها منه بشكل رسمي وبسبب احساسها بالإهانة قررت شادية تقطع علاقتها بيه تماما وفوق كده اتجوزت من أعز أصدقاءه ( المهندس عزيز فتحي ) وده سبب الم نفسي شديد لفريد الأطرش لدرجة أنه خلد قصة حبه ف اغنية من أروع أغانيه اسمها (حكاية غرامي)
ما تتأخروش عن الناس اللي بيحبوكم ولا تأجلو قراراتكم لمجرد إنكم تكسبو شوية وقت ..
الشخص اللي وقف جنبك الف مرة عشان كان بيحبك بجد وانت رفضته ، لما انت هتحتاجه بجد مش هتلاقيه لأنه خلاص حس انه مش فارق معاك ..
اللي بيحب بجد ما يقولش انا هغلط مرة أخيرة وبعدين اتغير لأن ممكن تكون دي الفرصة الأخيرة بالنسباله ..
الحب هو الحاجة الوحيدة اللي تستاهل إنك تتغير علشانه
الحب هو اللي هيعيش للنهاية عشان كده لازم تخليه دايما من اهم اولياتك
#د_امال_ابراهيم
#العلاقات_الصحية
