بقلم د / حسن اللبان
السيكودراما
نوع من أنواع العلاج النفسي بيجمع بين الدراما وعلم النفس الهدف الرئيسى منها مساعدة الشخص فى تفريغ المشاعر والانفعالات واللى بيتم عن طريق أداء أدوار تمثيلية ليها علاقة بمواقف حصلت فى الماضى أو فترة فى الحاضر بيمر بيها الشخص واحيانا بيكون ليها علاقة بمواقف ممكن تتعاش فى المستقبل
السيكودراما هدفها الاساسى مساعدة المشاركين فى انهم يفهموا مشاعرهم عن طريق تجسيد الواقع من خلال التمثيل علشان تخرجهم من عزلتهم …
السيكودراما بتقوم على مجموعة عناصر رئيسية ومهمة :
البطل: وهو الشخص نفسه اللى أحداث المسرحية بتدور حوله وبيقوم بتمثيل واقع حصله فى الماضى او بيمثل حاضر هو عايشه
المجموعة: الممثلين الباقين و بيساعدوا البطل ” الشخص صاحب القصة ” في أنه يؤدي دوره وكمان بيشاركوا فى تمثيل ادوار تانية في المسرحية
المشاهدين: اعضاء من المجموعة العلاجية بيشاهدوا المسرحية
المخرج:وهو المعالج النفسي بيكون خبير بالسيكودراما، وظيفته بتكون في إختيار الممثلين وكمان بيساعد فى وضع السيناريو واختيار المكان المناسب للعلاج والحفاظ على السرية .
المسرح : المكان الي يمثل الحياة بالنسبة للبطل بيقدر يتحرك ويمثل بحرية وعفوية، وبينظم المخرج ” المعالج ” المسافات بين الاشخاص علشان يساعد البطل أنه يعيش الحدث وكمان مساعدته في انه يخرج مشاعره ويعبر عنها من جديد
مراحل السيكودراما :
مرحلة الإحماء ” التحضير ” :
مجموعة السيكودراما غالبا بتتكون فى العادة من اشخاص مايعرفوش بعض علشان نقدر نندمج ونفتح قلوبنا ومشاعرنا لازم بيكون فى مرحلة تحضير وتعارف بيتم فيها تحضير المشاركين للدخول في أجواء السيكودراما و هدفها الاساسى بيكون مساعدة المشاركين فى انهم يبنوا ثقة وتفاهم متبادل واحساس بالتواصل والاحتواء علشان نقدر نفتح قلبنا ونحكى بدون خوف
التحضير بيكون عن طريق نشاطات مختلفة زى الالعاب ومشاركة قصص شخصية و المشاركة فى الفنون التعبيرية زى الموسيقى والرسم
مرحلة ” الاكشن ” :
فى مرحلة الاكشن بيختار المعالج والمجموعة شخص من المشاركين بيمثل دور بطل مسرحيته الخاصة اللى هتحكى عن موقف فى حياته او مرحلة فى حياته عطلان فيها
البطل المشارك فى المسرحية بيمر بمراحل كتير منها مرحلة البداية وهى ان البطل بيبدأ يختار موقف فى حياته حصل بيبدأ يحكى الموقف او المرحلة او المشاعر للمجموعة وبيختار اشخاص من المجموعة تمثل أدوار اشخاص او مشاعر فى قصته
وبنمر بمراحل تانيه فى المسرحية زى مرحلة عكس الادوار اللى بيلعب البطل فيها دور شخص بيمثل جزء من مسرحيته .. البطل بيقوم بمعايشة الواقع من وجهة نظر اشخاص تانيه فى قصته بتساعد مرحلة عكس الادوار البطل فى فهم المشكلة من وجهة نظر تانيه وبيقوم بتمثيل دور شخصيته الأساسية فرد من المشاركين في المجموعة بيختاره البطل بنفسه.
مرحلة دور المرايه وهنا البطل بيلعب دور المشاهد وكأنه بيتفرج على نفسه فى موقف معين اتحكى للمجموعة و بيمثل دور البطل شخص تانى من المجموعة بيختاره البطل بنفسه ويبدأ يحكى ويمثل القصة من وجهة نظر البطل وهنا البطل بيقدر يشوف نفسه من بره ويلاحظ هو اتصرف واتكلم واتعامل ازاى فى موقف معين ..
دور النموذج وهنا البطل بيكون مشاهد بس فرد تانى من المجموعة بيمثل دور البطل وهيحاول بتعامل بطريقه تانيه شايفها نموذجية فى الموقف اللى تحكى ومنها بيتعلم البطل ان احيانا فى طرق تانية كان ممكن يختلف الموقف لو اتعاملنا بيها
دور الدوبلاج بيقوم بيه شخص آخر من المجموعة بيلعب دور ظل البطل اللى يقوم بالتعبير شفوياً عن لغة جسد البطل .
في الدوبلاج بيقوم المخرج ” المعالج ” بإيقاف المسرحية ويسأل المريض إن كان ظله قدر ينجح في التعبير عن لغة جسده هنا بيتعلم البطل ان يفهم حركاته ودورها فى المواقف اللى بيمر بيها وممكن تساعده ان التعبير بيأثر على المواقف وان كان ممكن التعبير الحركى يغير موقف ما حصل
فى نهاية المسرحية المعالج بيساعد البطل انه يحكى تجربته والمشاعر اللى ظهرت فيها وبيشارك معاه أفراد المجموعة وجهات نظرهم في مسرحيته
