بقلم / أسماء كامل
(يا وجع الجرح)
دا محظوظ اللي حزنه يبان
ويلقى الدمع بيطيعه
في حزن بيدمن الكتمان
يخلي القلب من جوعه..
بيتدارى من النظرة
ورافض يظهر الكسرة
ودايما ظاهر الضحكة
اللي بتلالي..
ف عيون الشمس
وهو الأمس ..
كان بايت مع الحرمان
وليله تملي ليل بهتان
ولا بتضوي لسواده نجوم..
ولا تنورله غير دمعة
تحارب ف العيون ما تنام
وآآآه … منَّها الأيام
بتمشي تملي فوق روحنا
وترمي الشوك في مطرحنا
وبتسوي الجِناب بالآه
وعهد الله ☝🏻
ولا ليكم عليا يمين
بشوف عاشقين…
نارهم تحرق الميادين
وتكوي من القلوب فدادين
وباينين جوة عين الناس
ورود بتنور البساتين
وهما جروح ومفتوحة
وصوت حنجرته مبحوحة
بيصرخ فوق جبين الروح.
يا وجع الجرح لما يفوح
وطيفه يشكِّل الأحلام
بيزرع جوة منها آلام
ومجبورة القلوب تسقيه.
قولولي دواها فين نلاقيه !!
غير ف الكتمة للآهة.
ف خلّي قلوبنا تتباهى
بمظهر يعكس الجبروت
وفرحة تنور الملكوت
وتبني جوّة منها تابوت
وفيه بنداري ف الأحزان
دا محظوظ اللي حزنه يبان
# اسماء كامل
