لصحتنا النفسية بلاش نعمل لايك او شير لحد بينشر طاقة سلبية وهو مش واخد باله عشان يبدا ياخذ باله ويبطل .. الدنيا لسه فيها الخير رغم اي مشاكل او ضغوط، لو في كورونا وحروب و…و… ولكن ( ادخلوها بسلام امنين ) لسه في شمس بتطلع وبعد العسر يسر وبشر الصابرين وعسى ان تكرهوا شيئًا وهو خير لكم وتفاءلوا بالخير تجدوه وانا عند ظن عبدي بي فليظن بي ما شاء .. والناس لسه فيها الخير رغم اي شر ،، لو في مليون وحشين فكفايا ان في واحد كويس ( لانه مش بالعدد ) بدل ما تركز في الوحشين ركز في الحلو حتى لو قليل عشان ربنا يبارك فيه ويزيده.. يا ريت لصحتنا النفسية بدل ما نركز على النعم المحرومين منها فنركز على النعم اللي لسه موجودة بدل ما نحرم نفسنا من الاستمتاع بيها .. ولو حد واخد وسائل التواصل الاجتماعي وسيلة انه يعبر بيها عن مشاعره لانه حاسس وكأنه في ناس بتسمعه فانا بقوله مش مشكلة عبر عن مشاعرك بس وضح ان دي احاسيسك بلاش تكتبها بشكل خلاصة او نصيحة عامة .. واحنا اما نشوف حد بيعبر عن احاسيسه لازم ناخد بالنا ان دي احاسيسه وتجاربه هو فما تخليهاش تاثر فيك انك تعمم ان كل الناس وحشه .. ارحموا نفسكم ما تحملوهاش فوق طاقتها، ارحموا ضعفكم، ارحموا لو في اطفال او ناس لسه نقية بلاش نلوث نقاءهم ونحسسهم ان الدنيا غابة (لا) ربنا زي ما خلق المرض خلق الصحة، زي ما خلق الكره خلق الحب، زي ما خلق الفشل خلق النجاح، زي ما خلق الحرب خلق السلام، وزي ما خلق الطمع والبخل خلق الرضا والكرم وزي ما في ناس مش بيطمر فيها ومافيهاش الخير ففي ناس بيطمر فيها اقل حاجة وولاد اصول .. ومن رحمة ربنا ان دوام الحال من المحال والشدة مهما اشتدت بتزول ولكنها ارزاق ومقدرة وعشان يترفع البلاء لازم الرضا والصبر ،، فلنردد (اللهم لا اعتراض) ونقدر قيمة اقل نعمة انعم بيها علينا ربنا حتى ولو كانت (انك معاك موبايل دلوقتي وقاعد تقرا بوست )
#رشا_الجندي #علم_نفس_الواقع
