بقلم / أسماء كامل
بسبب حالة الجدل اللي حاصلة اليومين دول والتعليقات السخيفة على ياسمين_عبد_العزيز، عشان قالت رأيها في نوعية معينة من المسلسلات فجأة الناس قامت عليها: “إزاي تنتقد وهي عملت مسلسل شعبي قبل كده؟”
طب وهو طبيعي يعني ان الفنان يفضل محبوس في نوع واحد من الدراما؟!
#ياسمين طول عمرها فنانة شاطرة، ممثلة تقيلة، نجمة شباك، وجمهورها بيحبها من أيام الفوازير والإعلانات وأفلام العيلة والكوميديا الخفيفة اللي كنا بنستناها في العيد، طبيعي جدًا إنها تشتغل في كذا نوع من الدراما، شعبي، اجتماعي، كوميدي… هي فنانة شاطرة وشاملة ياجماعة وتقدر تعمل أي دور يُعرض عليها وتنجح فيه وتنجَّح كل اللي معاها كمان.
وكونها عملت مسلسل شعبي واحد أو اتنين كنوع من المساعدة، دا مش بيقلل منها، بالعكس، دا بيأكد إنها versatile متعددة المواهب وتقدر تلعب في كل الميادين، مش محصورة في قالب واحد زي فنانين كتير.
يعني بدل ما نهاجمها، المفروض نحترم فنها ورأيها ونفهم إنها بتتكلم من خبرة ومكانة، مش من فراغ، ومش معنى إنها اشتغلت في الدراما الشعبية قبل كده إنها ماينفعش تقول رأيها فيها.. طبيعي يعني تجرب كل انواع الدراما وهي قادرة تعمل دا، وبعدين بلاش ننسى نقطة مهمة جدًا…
إن ياسمين_عبد_العزيز مش بس بتنجح في أعمالها، دي كمان لما بتشارك في أي عمل، بتنجحه وبترفعه للسما وبتنجّح الكاست كله معاها وحطوا تحت الجملة دي مليون خط، يعني وجودها في أي مسلسل أو فيلم بيضيف للعمل، وبيشد الجمهور، وبيفتح باب النجاح لباقي الممثلين اللي معاها، وده طبعا مش أي حد يقدر يعمله، دي موهبة وحضور وكاريزما وخبرة سنين، والنجم اللي قادر انه يشيل عمل كامل لوحده ماينفعش نقارنه بحد محتاج اللي يسندله العمل.. وياسمين مش مجرد نجمة، دي ماكينة نجاح ماشية على رجلين، ولو دخلت أي عمل، بتعلّي من مستواه وتخلي الناس تتكلم عنه حتى قبل ما يتعرض، فبدل ما نقلل منها، لازم نعترف إن لياسمين فضل كبير على أعمال كتير وأسماء كتير ظهرت جنبها وبفضل فنها الجميل.
أما بقى عن” #مسلسل_وتقابل_حبيب”… أحب أقول انه ماكانش مجرد مسلسل بيتعرض على الشاشة، دا كان حالة… وحالة جميلة راقية، لمست قلوب الناس في كل الوطن العربي، المسلسل دا خلى الجمهور يضحك، ويعيط، ويحن، ويحب، ويفكر… قدم قصة إنسانية بسيطة بس معمولة بإحساس عالي جدًا، #وياسمين كالعادة، كانت روح العمل ونبضه، وقدرت توصل كل مشهد وكأنك عايش معاها اللحظة بجد، الناس اتفاعلت مع المسلسل مش عشان القصة بس، لكن عشان الحالة اللي خلقها… حالة من الرُقي، والصدق، والدفء،والخيال الجميل ويكفي إن الكل كان بيتكلم عنه وبيتفاعل معاه كأنه حكايته هو الشخصية مش مجرد تمثيل، ودي حالة مش أول مرة ياسمين تعملها… دا تاريخها كله مليان أعمال اتحوّلت لحالات وحكايات محفورة في وجدان الناس.
