بقلم دكتورة / جيهان النمرسي
أمثالنا النفسية
الطبع يغلب التطبع
من شب علي شئ شاب عليه
يستطيع الذئب ان يغير وبره
ولكن لا يغير طبعه
يظل الثعبان ثعبانا حتي لو غير جلده
ويظل الذئب ذئبا حتي ولم يأكل غنمك
كل الامثال دي بنستخدمها كلنا
كدليل ان طبع الانسان لا يتغير
واكتر شئ يؤيد كلامنا هو
المثل اللي بيقول ان الطبع بيخرج بعد الروح والمعني يفضل الانسان علي طبعه لحد موته
والسؤال ليه نجهد نفسنا
مع ان حقيقة البشر واضحة قدامنا
ليه بنحاول نغمض عنينا ونمثل دور الضحية ودور المهزوم المضحوك عليه واحنا عارفين طبيعة اللي بنتعامل معهم
الاجابة الغاية والهدف ياسادة
هو من يجعلنا نسخر من عقلنا ونتعشم في تغيير الطبع فتنبهر الفتاة بالعريس
الجاهز الغني ولكنه بخيل
أيوة بخيل في عواطفه بخيل في ماله
بخيل في كل المواقف لكنها بتضحك علي نفسها عشان هدفها
تتجوز واحد غني وجاهز
وهاتعيش عيشة سهلة وجميلة
ولكن الصدمة تبدأ
ويستمر الوضع ويستمر البخل في مشاعره
في حبه في صرفه عليها وعلي اولادها
ورغم انها شايفة بخله كويس اوي كانت بتقول حرص وخايف يصرف علي الفاضي
وها يتغير بعد الجواز ونفوجئ بانها قرفت وزهقت وكرهت الحياة ويا اما الطلاق
او المشاكل وصعوبة الاستمرار
وحالة تانية
شيفاه فتي احلامها
كل البنات بتتمناه وهو مع دي النهاردة
والتانية بتستناه ومش بيفكر غير بالبنات
بس هو هدفها وعاوزاه عشان تغيظ البنات
وهي اللي اخدته رغم عن كل البنات
وبتقول لنفسها الشقي قبل الجواز
بيبقا عاقل بعد الجواز
لكن هو مابيتغيرش وتفضل حياته الستات والبنات وتطلق هي لخيانته ولانه رافض يتغير
وينسي حياته زمان
وحالة تالتة
هو مبهور بجمالها بتحررها بأفكارها
بسهراتها وتقبلها واقبالها علي الحياة
فطريقة لبسها بتعجبه بتشده ولما يتكلم عنها
يقول دي أنسانه بتحب الحياة ومش ممله ومش نكدية فيقرر يتجوزها
ولكن بعد الجواز.
عاوز يغيرها مش عاوزها تتناقش
عاوز مايسمعش منها غير حاضر ونعم
وممنوع الخروج وممنوع السهر وغيري لبسك
اللي مش محترم وبيلفت النظر
وتصبح الطباع المختلفة التي كانت شداه اليها
تكرهه فيها ويفشل في تغيرها وتحويلها كعجينة يشكلها زي ماهو عاوز
وهي تكره تناقضه معها ومع نفسه
وهو يرد قبل الجواز غير بعده ياهانم
اختلافات كتير بنواجها مع نصنا التاني ونراها بوضوح لكن اصرارنا علي التكملة
والاستمرار واصرارنا ان نغير اللي معانا ونغيره علي مزاجنا هذا هو الفشل محدش بيتغير محدش بيشكل حد
ولكن كتير هايقولوا ويردوا علي
ان الحب والعشرة بتغير الناس وبتقرب المسافات بعد الزواج
هارد بتغير مفاهيم سلوك عابر او مكتسب
تغير شئ مش جذري بالشخصية
شئ مش مأثر فيه من صغره
واللي بيحب حد بصدق بيحاول يقرب من فكره من قلبه بيحاول يرضيه ويسعده
خلاصة القول
اقبلوا اللي بتحبوهم زي ماهما
طالما قررتم الحب وقررتم القبول
. واللي بيحب حد مابيشوفش عيوبه اصلا
وممكن يشوفها مميزات
زي الشك تبقا غيرة
البخل حرص
بتاع بنات واد شقي
وتوفيرا للفشل والنكد والطلاق
اختاروا صح
اختاروا ازواجكم أو زوجاتكم بدقة
لانكم ها تختاروا حياة
صعبة التغير
وتغيييرها يسبب العذاب
للقلب والنفس
ولكل اللي حواليك
اسعد الله قلوبكم
د/ جيهان النمرسي
