بقلم / أسماء كامل
والله الدنيا دي ما تسوى
إننا نتعادى ونتحارِب
أيامنا ف لحظة بتستقوى
على كل اللي عايشها محارب
على كل ضعيف فيها ومكوي
بنيران الفقر أو الحوجة
أيام من شدة قسوتها
بنحس انها أصلا عوجة
وزمان بيغير في ملامح
مرسومة ف لوحة مستقبل
لنهار عناقيد عايشة تكافح
و ف عز الشمس..
الليل قَبِّل.
ومسح من روحهم أحلام
منحوتة على خدودهم دمعة
وقلوبهم مدارية آلام
وسببها تملّي ظروف صعبة
أرواحنا خلاص صبحت لعبة
والكل عليها بيتقاول
مش فالح ومكمّل فيها
غير اللي عايشها بحال مايل..
ف يارب الكون “هاتها جمايل”
ونكمل أيامنا بسترك
من غير ولا حوجة ولا تحايل
ولا أفعال تهلكنا بغضبك.
اسماء كامل
