بقلم / أسماء كامل
#يا_كل_حاجة_وعكسها
يا أكتر حب علِّمني
أعيش العمر وحداني
يا أكتر نقطة كات ضعفي
وبرضه وجودها قواني
يا أكتر حد خلاني ..
كرهت الحب وعشقته
حلمت أعيشه ورفضته
بقوّي القلب في حضوره
وبضعف لما اجيب سيرته
يا أكتر قلب طمنّي
وجمِّد قلبي ع الأعداء
وأكتر قلب خوفني
ولو قرّب .. بقول يافراق
يا حضن حنانه دمرني
يا أعظم عشق يكسرني
يا أكتر حد قدمني
وبرضه بحبُّه أخَّرني
يا أكتر عشق هنَّاني
وعشت معاه معاني الفرح
وأكتر عشق بكاني
وبكفوفه سقاني الجرح
يا جنة وقلبي رايدها
ونار انا بدعي يبعدها
يا كلمة بتحيي أيامي
وبسهولة تموتها
يا أكتر حد ضحكني
وكانت ضحكة مالهاش زي
وأكتر حد حزِّني
على عمري اللي راح والجاي
يا كل الراحة والأوجاع
يا سكة دليلي فيها ضياع
يا عكس الحاجة واساسها
يا شاريني!! وهواك بيّاع
#جديد
#يا_كل_حاجة_وعكسها
#أسماء_كامل
