كتب / محمد رضا
في زمن السوشيال ميديا، إشاعة واحدة كفيلة تقلب الدنيا وتخلي الجمهور على أطراف الكراسي، وده بالضبط اللي حصل لما ظهرت صفحة مجهولة على “فيسبوك” باسم يورجن كلوب، المدير الفني السابق لليفربول، ونشرت منشور غامض فيه ثلاث إيموجيز: “تحميل + علم مصر + نسر”، ثلاث رموز بسيطة، لكن فعلها كان زي قنبلة دخان… وبدأت التكهنات:
هل كلوب في الطريق للأهلي؟ هل كولر بيودّع؟ هل هنشوف ليفربول بنَفَس أفريقي؟
الرد جه سريع وحاسم، ومن المصدر نفسه، كلوب بنفسه حط النقاط على الحروف وقال:
“أنا معرفش الصفحة دي، ومليش أي حساب على فيسبوك أصلًا، غالبًا دي صفحة معجبين.”
والمفاجأة الأكبر؟ عندما تم سؤاله عن حقيقة تدريبه للأهلي، خاصة وإن الفريق داخل على مشاركة عالمية في كأس العالم للأندية 2025، وكانت إجابته واضحة وصريحة:
“كلام فارغ، مجرد شائعات، دلوقتي أنا بركّز في شغلي الجديد كرئيس لكرة القدم العالمية في ريد بول، وبصراحة، بعد اللي عشته في ليفربول، محتاج شوية راحة من دوشة التدريب.”
ما وراء السوشيال: ما يخص كلوب وما لا يخصه
في خضم فوضى الحسابات المزيفة، اتضح إن يورجن كلوب عنده حساب وحيد رسمي على “إنستجرام”، بيستخدمه للتواصل مع جماهيره ومشاركة لحظات من حياته بعيدًا عن التمارين والصراخ على خط التماس.
والرسالة كانت واضحة جدًا من كلوب:
“لو رجعت للتدريب، هتعرفوا مني، مش من إيموجي نسر على فيسبوك.”
