كتبت / علا السعدني
يعني هي ميرفت امين بس اللي لما كبرت شكلها اتغير وعجزت ؟ طب ما كلنا كد لما بنكبر بنكون عواجيز وشكلنا وحش , المفروض يعني وكلنا سيد العارفين انها سنة الحياة لكن كل ذنب فنانتنا الكبيرة مقاما وسنا انها راحت تعزي المخرج الكبير علي عبد الخالق من غير ما تحط مكياج ولا تلطخ ولا تحط لطع علي وشها وده لانها حزينة جدا علي المخرج الكبير اللي زي ما كانت تربطهم الاعمال الفنية ببعض , فالاكيد برضه ان العلاقات الانسانية والصداقة وعشرة العمر الجميل هي اللي كانت بتربط بينهم اكتر واكتر ! يبقي ايه اللي كان مفروض تعمله نجمتنا الجميلة غير انها تروح علي طبيعتها الحزينة حتي لو كانت النتيجة انها تظهر علي هذا الشكل اللي خلاها فريسة عند اصحاب النفوس المريضة ! لكن واضح اننا بقينا بنموت في الغش والكدب والنفاق , وبعدين بعد كده نطلع ونعمل نفسنا ملايكة وقديسين واننا بنكره تلك الصفات عمي , طب بامارة أيه ؟ يعني كان هيعجبنا اكتر لو راحت العزاء وهي حاطة كيلو مكياج علي وشها , ولا الاحسن من ده انها كانت عملتلها كام عملية تجميل سريعة كده علي ماقسم , تشد فيها وشها وتنفخ بيها شفايفها وشوية فلير علي حبة حقن بوتكس اللي بترجع الشيخ لصباه ؟ للاسف مكناش هيعجبنا برضه وهنقعد نمصمص شفايفنا ونتهمها بالانانية والجحود وعدم احترام الموت وعدم الاحساس بالحزن علي فراق اعز الاصدقاء ! اذن العيب بقي فينا احنا وفي سلوكياتنا اللي اتغيرت وخلتنا وبدم بارد نجرح في الناس , وتحديدا في نجمة كبيرة غالية علينا جدا وبدل ما نحترمها علي صدقها في مراعاة جلال الموت وجو العزاء الحزين , نقوم نهين فيها وفي شكلها اللي كبر وعجز , ده غير طبعا بتوع الحلال والحرام اللي بيشمتوا في اي حد طالما مش اتبعاهم وشماتتهم المرة ديه كان علشان هي فنانة فبتقي علي طول وشها عليه غضب ربنا ! والله انتوا اللي عليكوا غضب الله لانكم كرهتوا الناس في ديننا السمح الجميل معلش يا قطة الشاشة الجميلة وسيبك من الاشكال الضالة ديه , انتي طول عمرك قمر وهتفضلي بالنسبة لينا قمر طول الوقت , وانا واحدة من الناس اتمني لما اكون قدك في السن ابقي قمر كده زيك
