# “غزل البنات” الفيلم الاسطوري

كتبت / منال خطاب

ليه فيلم “غزل البنات” فيلم اسطوري و مش هيتكرر تاني ؟

1- الفيلم كان بيجمع اتنين من أعمدة و مؤسسي السينما في مصر ، نجيب الريحاني و يوسف وهبي
2- موسيقى الفيلم كانت من الحان موسيقار الاجيال ” محمد عبد الوهاب ”
3- الفيلم كان مجمع شوية نجوم ما حصلوش ، ليلى مراد ، نجيب الريحاني ، انور وجدي ، سليمان نجيب ، فريد شوقي ، محمود المليجي ، استيفان روستي ، زينات صدقي ، فردوس محمد ، عبد الوارث عسر .. كل اسم من دول حاجة كبيرة
4- و زيادة الخير جابوا يوسف بك وهبي و محمد عبدالوهاب ضيوف شرف في الفيلم بشخصياتهم الحقيقة
5- الفيلم كان بداية ظهور هند رستم ، ظهرت (كومبارس صامت) ورا ليلى مراد في اغنية ” اتمختري يا خيل ”
6- كمان الفيلم كان الظهور الاول لـ داليدا كومبارس صامت بردو .. و كان بردو الظهور الاول لـ الممثلة ” نبيلة السيد ” كانت طفلة عندها 10 سنين
7- وديع الصافي كمان ظهر فيه و كان عازف ناي
8- الفيلم كان ميكس عجيب ، ما تعرفش ده فيلم غنائي و لا كوميدي و لا درامي و لا ايه بالظبط ، تسمع احلى اغاني من الست ليلى و تضحك مع نجيب الريحاني و تعيط عشانه بردو …
9- الفيلم تم اختياره في قايمة افضل 100 فيلم مصري و اخد المركز التاسع
10- الفيلم كان انتاج و اخراج و بطولة انور وجدي و كان مساعد المخرج معاه ” منير مراد ” اخو ليلى
11- الفيلم كان فيه 7 اغاني لـ ” ليلى مراد ” و الحان عبدالوهاب ، متخيلين العظمة .. ( أبجد هوز ، اتمختري يا خيل ، الدنيا غنوة ، الحب جميل ، ماليش امل ، عيني بترف ، عاشق الروح )
12- الفيلم كان الظهور الأخير للجميل نجيب الريحاني ، اللي مات وقت تصوير الفيلم .. و ده خلى انور وجدي يحتار هيقفل الفيلم ازاي ، و مشاهده ما خلصتش ، فلجأ لتغيير النهاية ..
و روج للفيلم على اساس انه اخر افلام الريحاني و ده زود اقبال الجماهير ع الفيلم وقتها .. و برغم مرور ٧٤ سنة على انتاج الفيلم الا انه لسه عايش للنهاردة و بيتشاف من كل الاجيال.