كتب د / حسن اللبان
الفنان عمر الشريف تحدث عن مشاركته في فيلم المواطن مصري 1991 بدور العمدة وقال:” أنا مش عارف صلاح ابو سيف جابني ليه في دور العمدة عبدالرازق يعني لو كان جاب واحد زي محمود مرسي أو عبدالله غيث كان عملوا الدور بسهولة لكن الدور كان بالنسبة ليه تحدي كونه عمدة من الأرياف وشرير وفي فترة السبعينات”
الكاتب يوسف القعيد صاحب الرواية المقتبس عنها الفيلم بيقول عن مشاركة عمر الشريف في الفيلم أنه مكنش حابب أن عمر الشريف هو اللي يقوم بالدور لأن قناعات واتجاهات عمر الشريف عكس قناعات واتجاهات يوسف القعيد فالقعيد ناصري ويروج في روايته للفكر الناصري ضد مرحلة الرئيس السادات التي عقبت الرئيس عبدالناصر ولكن رغم اختلاف التوجهات لم ينكر أن الشريف أهتم بالتفاصيل الصغيرة في الدور زي أنه نزل العتبة بنفسه وراح للمحلات وسألهم لو عمدة في السبعينات يلبس إيه وجاب من هناك الساعة الخضرة والنضارة والبدلة المقلمة ولما الإنتاج عرض عليه ملابس الشخصية وحب أنهم يأخدوها تاني قالهم لا سيبوها معايا في اوضتي في الاوتيل عشان اخد علي اللبس وابقي مرتاح فيه قدام الكاميرا ومبقاش اول مرة ألبسه قدام الكاميرا لأن هيبان اني مش مرتاح في اللبس.
الفنان عزت العلايلي بيقول “أنا قبل ما أشتغل مع عمر مشفتش عمر غير مرة واحدة في لندن وقابلني كويس جداً رغم أنه ميعرفنيش بس كان كفاية عليه يعرف إني مصري.. فلما جينا نعمل الفيلم مكنش يعرفني فدخلت عليه في الاستوديو وكلمته فلاحي وقولتله انت مش عارفني وفكرته بنفسي فضحك وقالي يا أبن الايه أنا فكرتك فلاح بجد وقبل ما يبدأ الفيلم أحد أفراد طاقم الفيلم كان معترض علي وجودي في الفيلم واللي دعمني ووقف جنبي وساندني أن أنا أعمل الدور كان عمر الشريف.”
ورغم أن عمر الشريف مدرك بحسه الفني من اول لحظه أن عزت العلايلي لائق علي الدور أكثر منه وأنه بالبلدي هيخطف منه الكاميرا وهيبقي في مقارنة بين أداء عمر كفلاح وعزت كفلاح والمقارنة مش في صالح عمر بس عمر وجد أن من مصلحة الفيلم أن عزت العلايلي هو اللي يعمل الدور وكمان مكنش بيخجل أنه يسأل عزت في بعض التفاصيل الخاصة بالفلاحين والأوضاع السياسية والاقتصادية والاجتماعية في الوقت ده في مصر لأنه كان بعيد فترة كبيرة عن مصر.
أخيراً، كانت الفنانة صفاء ابو السعود مستضيفه الفنان عزت العلايلي في برنامج ساعة صفا وجابت المخرج الكبير على بدرخان شكر في عزت العلايلي عن أداءه في الفيلم وقال إن عمر الشريف مكنش موفق في اختياره لعمل الدور وأنه عمل مجهود مضاعف عشان يمثل الدور بالشكل ده في حين أن عزت كان لابس الشخصية فصفاء ابو السعود بتقول لعزت إيه رأيك في الكلام قالها على بدرخان مخرج كبير بس انا لايمكن أقول رأيي في زميل لي.
