# ذكرى الكاتب الكبير إحسان عبد القدوس

كتب د / حسن اللبان

النهاردة ذكرى إحسان عبد القدوس .. احسان اصلا ابن محمد عبد القدوس .. وفاطمة اليوسف او روز اليوسف.. تقريبا دي الست الوحيدة اللي الاستاذ الغيطي معرفش يخليها تحب الريحاني في المسلسل

روز اليوسف قابلت محمد عبد القدوس في النادي الاهلي.. محمد عبد القدوس طلع على المسرح وقال مونولوجات وفواصل كوميدية وهو كان دمه شربات.. فـ اعجبت بيه روزز اليوسف واتجوزوا وخلفوا احسان.. وزي ما قالت ياسمين صبري الست بتحب اللي يضحكها.

يمكن انت مىتعرفش محمد عبد القدوس اسما؟ بس هو ليه ادوار مهمة .. زي مثلا دور والد لبنى عبد العزيز في فيلم انا حرة .. اللي هو فيلم عن رواية ابنه احسان .. وهو مثلا العبقري والد عصفور في سر طاقية الاحفاء ..

ابو محمد عبد القدوس .. كان راجل ازهري.. و رئيس كتاب بالمحاكم الشرعية.. فازاي ابنه يشتغل ممثل ويتجوز ممثلة .. وممثلة وقتها يعني عيب قوي قوي .. انت بتتكلم في بدايات القرن العشرين يعني .. فراح طارده ابنه محمد من البيت ..

فاطمة اليوسف .. او روز اليوسف .. ست لبنانية .. امها وابوها ماتوا .. واتبنتها بغرض التربية اسرة مسيحية .. كانت الست صاحبة والدتها .. والاسرة كانت مهاجرة امريكا بيها .. السفينة وقفت في اسكندرية .. وكان ساعتها في واحد اسمه اسكندر فرح يعرف الاسرة .. فقالهم يتنازلوا عن البنت اليتيمية علشان يربيها .. فاتنازلوا .. تقريبا كانوا بيتلككوا .. ومن عند اسكندر فرح بدأت طريقها في الفن والصحافة… وهي ست تقيلة بالمناسبة .. تقدر تعتبرها من اشهر 100 ست في مصر..

فإحسان بقى تايه بين بيت جده العالم الازهري .. اللي كانت فيه الست ممنوع اصلا تدخل مكان فيه رجالة بشعرها او بحجاب .. ممنوع يتسمع صوت ست اصلا.. وبيت امه اللي هو بيت بيتعمل فيه صالون ثقافي بتنظمه وتديره ست .. فيروح هنا يسمع كلام ويروح هناك يسمع كلام تاني خالص.. فالواد يا عيني دماغه بتعمل ايرور..

لكن لو انت تعرف احسان عبد القدوس من مسلسلاته وافلامه .. فاحب اقولك ان اللي انت بتشوفه من اعمال احسان عبد القدوس مش شغل احسان عبد القدوس خالص .. خالص .. وسع كدا يا أستاذ سيد .. خالص..

لن اعيش في جلباب ابي مفيهاش غير 20% بس من شغل احسان والباقي مصطفى محرم .. ولو قريت الرواية هتكره عبد الغفور .. وهتعرف ان نظيرة كانت بتروح لحسين الشقة وكانت الحياة سكينة في الخلاط ومش عارف يعني ايه هي اتكتبت كدا .. ولو شفت حتى لا يطير الدخان هتلاقي رواية تانية وشخصية فهمي عبد الحميد دي شخصية هتكرهها.. لو شفت الراقصة والسياسي .. فدي قصة قصيرة لاحسان وبعيدة كل البعد عن فيلم وحيد حامد..

فانت بتعرف احسان تاني خالص غير احسان اللي كتب الروايات .. احسان هو المعادل الروائي لنزار قباني .. في فترة ما مفيش مراهق مقراش لاحسان عبد القدوس .. لذلك مثلا في رواية الكويتي سعود السنعوسي فئران امي حصة .. البنت جالها اكتئاب لما احسان عبد القدوس مات … تأثير عابر للحدود.. وهي دي القوة الناعمة ..

فخلينا نكتب شوية عن ادب احسان عبد القدوس .. حياته.. ازمته بسبب مصطفى محمود .. ازمته مع جمال عبد الناصر.. قضية الاسلحة الفاسدة…. وغيره وغيره.