كتبت / سلوى لطفي
رغم إن مشوار الفنان الكبير أحمد مظهر كان مليان نجاحات وأعمال خالدة، إلا إن نهايته كانت مؤلمة جدًا..
الحكاية دي كشفت تفاصيلها الفنانة الراحلة مريم فخر الدين في لقاء تليفزيوني قديم.
مريم قالت إنها كانت من أقرب الناس لمظهر في الوسط الفني، مع صديقتها الفنانة نادية لطفي. وخلال ظهورها مع الفنانة صفاء أبو السعود في برنامج “ساعة صفا”، حكت عن النهاية الحزينة اللي عاشها.
وقالت إن مظهر نفسه هو اللي حكى لها إن أولاده عملوا عليه حجر، رغم إنه كان صاحب أملاك كبيرة، منها حوالي 30 فدان أرض، قيمة الفدان وقتها كانت توصل لمليون جنيه، وقالت إنها اتعلمت درس كبير من اللي حصل له، خصوصًا إنها كانت هي كمان تمتلك حوالي 10 فدادين، فقررت توزعهم على أولادها وهي عايشة، علشان ما يحصلش معاها نفس اللي حصل معاه.
صداقة مريم بأحمد مظهر استمرت حوالي 40 سنة، من وقت ما اشتغلوا سوا في فيلم رد قلبي، وكان دايمًا يحكي لها عن المشاكل اللي بيعانيها مع أولاده ، وقالت إنه حكى لها مرة إن ابنته طلبت منه بشكل مباشر 3 فدادين من أرضه.
وحكت كمان إنها راحت تزوره مرة ومعاها نادية لطفي، وكمان السيدة كوثر شفيق زوجة المخرج عز الدين ذو الفقار، لكن زوجة مظهر استقبلتهم استقبال سيئ جدًا، واتهمت مريم إنها متجوزاه في السر، وقتها ردت مريم وقالت لها: لو كنت فعلًا متجوزاه، كنت خدته معايا لشقتي اللي قدام حديقة الحيوان في الجيزة، وأقعده في البلكونة ياخد شمس، بدل ما هو محبوس في البدروم بالشكل ده ،وكانت تقصد إن الوضع اللي كان فيه وقتها كان مأثر جدًا على صحته.
ومن المعروف إن أحمد مظهر توفي في النهاية بسبب التهاب رئوي حاد.
مريم كمان قالت إن أسرته كانت بتتعمد استقبال أي حد ييجي يزوره بطريقة سيئة، علشان يقطعوا عنه الزيارات. وكان مظهر طول الوقت حاسس بوجع نفسي، لأن أولاده كانوا بيحرموا عليه حتى أبسط طلباته.
وفي مرة، الفنان سمير صبري حاول يعمل معاه حوار تليفزيوني، فطلبت منه مريم إنه يدي لمظهر مبلغ بسيط مقابل اللقاء ، وبالفعل سمير جاب ظرف فيه فلوس. مظهر فرح جدًا بيه، لأنه كان كبر في السن وبقى مش بيشتغل، فحط الفلوس بسرعة في جيبه.
لكن المفاجأة إن زوجته مدت إيدها فورًا في جيبه علشان تاخد الظرف، وفضلوا يتخانقوا عليه قدام الكاميرا.. والمشهد الغريب ده اتصور بالكامل.
وقالت مريم كمان إن حتى الحاجات اللي جابها سمير صبري له اختفت بعد كده، وأضافت إنها بعد المعاملة السيئة اللي شافتها من أسرته، قطعت علاقتها بيه تمامًا.
ربنا يرحمه ويغفر له ويسكنه فسيح جناته 🤲
