كتبت / سلوى لطفي
شكري سرحان اكتر فنان اندر ريتد في تاريخ مصر.. هتلاقي فيه التراس لاحمد رمزي والتراس لرشدي اباظة… وناس ميالة لصلاح ذو الفقار .. لكن مبشوفش فيه اولتراس ليه.. رغم انه اكتر فنان عمل افلام مهمة.. واكتر فنان ليه افلام بطولته في قائمة افضل 100 فيلم… بـ 16 فيلم.. متخيل الرقم..
يعني خد عندك
دور إمام في شباب امرأة.. واحد من أفضل أفلام صلاح أبو سيف.. فيلم ناضج في كل حاجة..
او دور ابو العلا في الزوجة التانية.. او دوره الرائع في فيلم البوسطجي.. او رائعة قنديل أم هاشم ١٩٦٨..
يا راجل دا سنة 68.. عمل 3 افلام كلهم في قائمة افضل 100 فيلم..(المتمردون ١٩٦٨، البوسطجى ١٩٦٨، قنديل أم هاشم ١٩٦٨)..
في سنة 1962.. عمل فيلمين احسن من بعض.. اللص والكلاب ١٩٦٢، صراع الأبطال ١٩٦٢.. والاتنين في قائمة افضل 100 فيلم..
كل الافلام دي من غير ما يحط مكياج.. هتلاقيه شرير ماشي.. رومانسي وجان ماشي.. متعلم ولبق وحورتجي ماشي.. فلاح وتلح وميعرفش الالف من كوز الدرة ماشي.. عنده قدرة غريبة على لبس الشخصية وكإنه اتولد كدا..
يعني مثلا شوف سعيد مهران في اللص والكلاب.. وشوف ابو العلا في الزوجة التانية.. شخصيتين مختلفتين تماما..
بحبله قوي فيلم السفيرة عزيزة… واحد من الطف الافلام اللي مهما بتتعاد بشوفها تاني.. ورغم انه طار في اخر الفيلم على الج* زار طيرة مطارهاش سوبر مان في كل افلامه.. بس الفيلم دا لطيف قوي..
شكري سرحان اخو صلاح سرحان وسامي سرحان.. انت تعرفهم الاتنين.. صلاح سرحان اللي كان عامل دور اخو صالح سليم في الشموع السوداء.. ومات صغير بعد الفيلم علطول وحزن عليه شكري قوي وسماه ابنه صلاح على اسمه.. لكن صلاح ابن شكري سرحان برضه مات صغير بعد ما عانى من اكتئاب شديد..
التاني سامي سرحان اللي هو جد محيي الشرقاوي في فول الصين العظيم.. ووكيل الوزارة في فيلم الناظر .. وعايز امضتي يا سيدي.. ادي امضتي اهي.. اهي… سامي سرحان كان شقي جدا وهو صغير زي ما كان بيقول في فول الصين العظيم.. عم اشقية مصر.. ولما كان شاب ق** تلوا واحد هو وصحابه في ملهي ليلى وأخد 15 سنة سجن.. ويقال ان شكري قدم التماس لعبد الناصر بعد تكريمه في عيد الفن… وافرج عن سامي بعد 10 سنين.. وشكري قدم قصتهم في فيلم اسمه احنا التلامذة.
شكري اتجوز في حياته مرتين.. الاولى من واحدة ارمينية اسمها هيرمين.. واعتزلت الفن.. بس الاتنين متوفقوش… وانفصلوا وعاش فترة كدا حزين وزعلان.. لحد ما اتجوز من السيدة نرمين عوف.. وخلف منها صلاح ويحيى.. بس قبل جوازه من نرمين بمفيش مات اخوه صلاح… شكري سرحان سمى ابنه يحيى لان وقت ولادة ابنه كان الشيخ محمد رفعت بيقرا قوله تعالى “يا زكريا إنا نبشرك بغلام اسمه يحيى”… فقال دي بشارة.
في اخر فترة من حياته كان معتكف طول الوقت، ولقبوه وقتها بعاشق القران.. ومات في هدوء في سنة 1997.. الله يرحمه
