كتبت / منال خطاب
ماتت نعيمة عاكف.. ودي اخر كلمة قالتها
حسين فوزي ومراته نعيمة عاكف اتجوزوا سنة 1953 .. هي كانت بتحبه وهو كان استاذها ومكتشفها ومخرج غالبية افلامها وصانع نجاحها.. هي كان نفسها تخلف بس هو كان رافض ، ويقال والعهدة على بتاع العهدة انه كان عنده عيال من مراته الاولى ومكتفي بيهم وشايف ان خلفة ولاد هيعطل مسيرة نعيمة الفنية .. فهي أصرت تتطلق .. ولاول مرة يكون الطلاق في حضور الصحافة.. والاتنين فضلوا يبكوا بعدها.
بعدها اتجوزت محاسب اسمه صلاح الدين .. وهو اتجوز من ليلى طاهر … أفلامه محققتش النجاح المطلوب.. وهي كمان … يعني لا هي نجحت من غيره ولا هو نجح من غيرها… فتعب وبدأ المرض يتمكن منه ومات … وهي أول ما خلفت سمت ابنها محمد واكتشفت أن عندها السرطان …
هو مات سنة 1962 .. ودي السنة اللي خلفت فيها ابنها محمد اللي قالت هسميه على اسم اشرف الخلق … وهي ماتت بعده باربع سنين سنة 1966.. وكان اخر حاجة قالتها “”محمد… محمد… محمد”… وسكت صوتها للابد… وهي 37 سنة بس.. في 23 ابريل سنة 1966..
