بقلم / أسماء كامل
العقل اتمرد من غلبه
ويوماتي انا بهرب من حبه
وانا نفسي أعيش ليلة ف قربه
وبقول للقلب اتحداني
وِاقدر على عيشتك وحداني
مش عايزة اتعذب من تاني
فيرد القلب انا مش قادر
دانا لولا عاملِك ١٠٠ خاطر!!
مش عايز احطِك في مخاطر
أنا كنت جريت من بين ضلعك
ولا يوم فكرت اني اطاوعك
ولّا اسمع مرة لصوت عقلك
ورميت النبض ف احضانه
ما انا أصلا مخلوق علشانه
وانا ليه احرم نفسي حنانه
ماهو برضه بيتمنى وجودي
عايش واسير جوة حدودي
لما ابعد بيقول يا تعودي..
يا أجيلك جوه الأحلام
أنا عايشة معاه أحلى غرام
بيقول انا مش ببقى تمام
غير لما بشوفك قدامي
لخبطني ولخبط أيامي
بيكون ويايا وفي منامي
وقصادي وهو بعيد عني
حيرني بجد وجنني
دا بروحه وقلبه بيوعدني..
الفرح هعيشه وانا ف قربه
اه يانا منه ومن حبه
دا تعبني معاه هو وقلبه
واهو عقلي استسلم من غلبه ،،
