بقلم / حسن اللبان
سيده عجوز حست بألم في ضرسها
قالت لجوزها
قالها اتحملي يومين هاقبض المعاش ونروح للدكتور
اتحملت اليومين وراحوا للدكتور
قالها ده لازم يتحشي لان التسوس واصل للعصب
ولما سألت عن التكلفه اتفاجئت ان تكلفة الخلع ارخص من الحشو
فقالتله لا يادكتور انا مش حمل حشو وجلسات واجي واروح
هو العمر فيه قد ايه علشان احشيه
اخلعه وريحني من ألمه
الدكتور حاول يقنعها بشتى الطرق ان خساره يتخلع لان وجوده مهم
لكنها اتحججت بكتر الجلسات وانها مش حمل وجع الحشو
جوزها قاله هستأذنك في كلمتين على انفراد
وراح قاله ممكن نحشيه واقسط ليك تكلفة الحشو على مرتين ، نص المرادي ونص اول الشهر الجاي ، بس تقولها انك اتلغبطت وعكست الاسعار وان تكلفة الخلع هي اللي اغلى
وبالفعل وافق الطبيب واقنعوها بالحيله دي اللي صدقتها
وتم الحشو
فات شهر والعجوز راح العياده علشان يدفع نص المبلغ اللي كان مبقيه من المره اللي فاتت
فايتفاجئ بالطبيب بيقوله
انا مستنيك بقالي ٣٠ يوم
انا ومراتي محرومين من الخلفه بقالنا ٨ سنين
وروحنا لاكتر من طبيب وللاسف بدون فايده
والورقه ام ٢٠٠ جنيه المقطوعه اللي ادتهاني وسط الفلوس
كنت محرج ارجعهالك لاني عارف ظروفك وجايز مايكونش معاك غيرها
دفعتها لاختبار الحمل بتاع زوجتي
اللي طلع ايجابي بعد ٨ سنين فحوصات ومحاولات
وكمل الدكتور كلامه وقاله
انت انسان محب وعلى قد حبك لزوجتك ربنا انعم عليا بحبكم وفرحني في نفس اليوم ، وده ظرف بسيط
فيه اللي اتدفع المره اللي فاتت مع مبلغ تاني كنت هدفعه في شوية فحوصات خاصه بالحمل ، هدية بسيطة ارجوك تقبلها
رفض العجوز بشده وقاله
حقك انك تدي الظرف للي محتاجه
لكن حقي اني احس اني مازلت قادر اسعد زوجتي حتى ولو هنام مديون
